A Confederación Galega de Persoas con Discapacidade (COGAMI) inicia un curso de Recepcionista-Telefonista que se imparte na Casa da Cultura do Concello de Salvaterra.
Esta formación, que financia a Consellería de Política Social e o Fondo Social Europeo, consta de 200 horas de teoría e práctica que se imparten ata o día 29 de abril, en horario de 9 a 14 horas, e está dividida nos seguintes módulos: Ofimática Básica, Operacións básicas administrativas ademais de Técnicas básicas, recepción, atención chamadas e
comunicación.
O curso remata ao finalizar as 50 horas de prácticas non laborais que se imparten dende o 16 ata o 29 de abril en empresas da zona que colaboran con COGAMI para a formación.
O curso inicia con 12 persoas, 9 mulleres e 3 homes, todas elas con certificado de discapacidade do 33% como mínimo, con idades comprendidas entre os 30 e os 60 anos, que proceden dos concellos Salvaterra e Ponteareas. O obxectivo xeral desta acción formativa é proporcionar ao alumnado o coñecemento das técnicas de recepción e atención ao cliente. A maioría das persoas que forman parte do curso traballaron anteriormente en sectores diversos como limpeza, industria alimentaria, vendas, loxística e hostalería.
COGAMI proporciónalle ao alumnado as destrezas profesionais que lle permitan un rendemento competitivo no mercado de traballo, co fin de acadar a plena participación social e laboral. Todas as persoas que iniciaron este curso estaban apuntadas no servizo de emprego que ten COGAMI, un servizo que conta arestora con 388 persoas inscritas na
comarca de O Condado, das que 91 residen no concello de Salvaterra.
