A sección segunda da Audiencia Provincial da Coruña absolveu por falta de imputabilidade, de acordo co veredicto do Tribunal do Xurado, á muller que matou en Arzúa en xullo de 2016 un matrimonio ao que coidaba e feriu o seu sogro cun coitelo.
Como medida de seguridade, a Audiencia acordou o seu internamento para tratamento médico nun centro psiquiátrico penitenciario adecuado ao seu tipo de anomalía ou alteración psíquica por tempo máximo de 30 anos. A muller non poderá abandonar o establecemento sen autorización do tribunal, o cal poderá modificar a medida de seguridade segundo a súa evolución de acordo ao Código Penal.
O Tribunal do Xurado considerou probado que durante a comisión dos feitos a acusada presentaba un trastorno psicótico agudo que anulaba totalmente as súas capacidades cognitivas e volitivas. A Audiencia destaca na sentenza que, de acordo cos informes periciais, a muller “presenta perigo criminal”, polo que é necesario tratala “nun centro acorde coas súas características e condicións persoais”.
