Urxencias Sanitarias de Galicia-061 asistiu durante a fin de semana a un total de 38 persoas en 29 accidentes de tráfico ocorridos nas estradas galegas, a maioría homes de entre 25 e 39 anos. Os sinistros acabaron cunha persoa falecida no lugar do accidente, 32 feridos que tiveron que ser trasladados a centros sanitarios e cinco que foron atendidos no lugar do sinistro.
A provincia con maior número de incidentes foi A Coruña, onde se rexistraron 13 sinistros, seguida de Pontevedra (10), Lugo (4) e Ourense (2). Entre os recursos mobilizados polo 061 estiveron unha ambulancia medicalizada para acudir a dous sinistros, o helicóptero medicalizado a outros dous, ambulancias asistenciais noutras 31 ocasións e os médicos de Atención Primaria noutros seis.
