A Deputación de Pontevedra adxudicará nos próximos días o servizo de teleasistencia para 45 concellos, do que dependen 358 persoas que están acollidas na actualidade. O presidente da institución provincial salientou este mércores na sinatura do convenio que, a pesar de non ser esta unha competencia da Deputación, considera necesario manter este servizo. Das cinco administracións que o cofinanciaban inicialmente, hoxe en día susténtano unicamente entre os concellos e a propia Deputación.
Son un total de 45 os concellos da provincia pontevedresa de menos de 20.000 habitantes que este mércores asinaron con Rafael Louzán os convenios de adhesión a este programa, coa intención de manter un servizo que permite a moitas persoas maiores que viven soas ou pasan a maior parte do día sen compañía, permanecer no seu fogar e no seu ámbito social coas garantías dunha atención permanente.
A Administración Provincial pasa de financiar o 26% do servizo a cubrir o 34% do custo, cun presuposto de 163.000 €, unha mellora que onte mesmo, en declaracións a vigoalminuto pedía o alcalde de as Neves, Raúl Emilio Castro.
Louzán lembrou que a Deputación tivo que sacar a concurso a xestión deste servizo, despois de que o Imserso, que era a que tiña a súa xestión, deixase de financialo.
A empresa adxudicataria coñecerase nos próximos días, para que poida comezar a operar de inmediato. Nestes momentos son 358 os usuarios do servizo de teleasistencia e o perfil máis frecuente do usuario é o dunha muller de idade avanzada, viúva e que vive soa.
