Air Nostrum amplía este verán a súa operación nos aeroportos galegos e ofrecerá case 100.000 prazas ao longo da tempada, o que supón un aumento dun 29% respecto a o ofertado o ano pasado.
Segundo explica a aerolínea, operará dende Santiago seis rutas, tres máis que o ano pasado. En concreto, mantense o enlace con Bilbao que se opera todo o ano, incorporouse dende o 4 de maio a ruta con Mallorca e recupéranse as conexións con Tenerife e Las Palmas de Gran Canaria. Ademais, este ano incorpóranse novas rutas de marcado carácter vacacional para as semanas centrais do verán, a Fuerteventura e Lanzarote.
Durante dous meses completos, do 1 de xullo ao 1 de setembro, Air Nostrum voará a diario a Tenerife, enlace que disporá de 11.520 prazas, é dicir un 43% de incremento interanual. Tamén rexistrará un aumento da oferta de prazas a conexión con Gran Canaria. Do 19 de xullo ao 1 de setembro se ofertan 9.000 prazas, o que supón case duplicar os asentos ofertados en verán de 2012. Haberá todos os días voos á illa e, como novidade, introdúcense frecuencias nocturnas adicionais os fins de semana do 3, 10 e 17 de agosto para ampliar a capacidade da ruta.
Mentres, dende o 4 de maio Air Nostrum oferta a ruta con Mallorca os sábados. A partir do 19 de xullo e ata o 1 de setembro operaranse tres voos semanais, os mércores, venres e domingos. No conxunto da tempada ofreceranse 7.420 prazas. Este voo, ademais, permite conectar dende Mallorca con Ibiza e Menorca.
Dende Vigo, Air Nostrum operará catro rutas. Mantén a operación con Bilbao e incorporará destinos ás illas durante as vacacións, Las Palmas de Gran Canaria e Tenerife. Ademais complementará a oferta de Iberia na ruta de Madrid durante o mes de agosto.
Nas semanas centrais do verán, Air Nostrum unirá Canarias con Vigo mediante dúas frecuencias semanais, os xoves e sábados. Tanto na ruta con Grande Canaria como na que une Vigo con Tenerife o número de prazas ofertadas será de 2.340 prazas. A conexión con Bilbao será tamén de tres frecuencias á semana, os luns, mércores e venres.
A partir do 2 de setembro increméntase a oferta de prazas porque se cambia de módulo de avión, pasando a operar cun CRJ 900, mantendo as tres frecuencias semanais, os luns, mércores e venres. En total a ruta disporá de 10.820 prazas ao longo da tempada. O enlace de Vigo con Madrid suporá unha oferta de 3.800 prazas durante o mes de agosto nun horario complementario á oferta de Iberia.
