A taxa interanual do índice de Prezos ao Consumo (IPC) situouse o pasado mes de xullo no 2,0% en Galicia, dúas décimas por debaixo da media española, onde a taxa foi do 2,2%, segundo os datos feitos públicos este martes polo Instituto Nacional de Estadística (INE). Pola súa banda, con respecto ao mes anterior, os prezos baixaron un 0,5%, tres décimas máis que no conxunto do Estado (-0,2%).
Na evolución por capítulos, os grupos que tiveron un comportamento menos inflacionista en xullo en Galicia foron os de ‘Vestido e Calzado’ (-12%), ‘Comunicacións’ (-1,8%), ‘Enxoval’ (-0,8%) e ‘Alimentos e bebidas non alcohólicas’ (-0,2%). Por outro lado, os apartados que presentaron unha maior suba dos prezos foron os de ‘Medicina’ (7,2%) e ‘Ocio e cultura’ (1,7%).
En termos interanuais, o grupo ‘Comunicacións’ rexistrou un descenso do 4,6%. Pola contra, os que presentan un maior incremento son ‘Bebidas alcohólicas e tabaco’ (8,7%), ‘Vivenda’ (6,5%) e ‘Medicina’ (5,3%).
Índices provinciais
En relación cos índices provinciais, Lugo é a provincia galega que presenta un maior descenso na taxa mensual dos prezos, co -0,6%, mentres que A Coruña, Ourense e Pontevedra rexistraron unha baixada do 0,5% respectivamente.
