Carlos Díaz | vigoalminuto
Movemento Sumar Galicia reclama que o convenio entre o Arcebispado de Santiago, Cáritas Diocesana e o Colexio Oficial de Arquitectos de Galicia (COAG) se traduza en vivendas sociais para persoas con dificultades de acceso a un fogar. A organización advirte de que o compromiso de estudar o patrimonio eclesiástico non garante que os inmobles acaben convertidos en casas accesibles nin establece prazos ou obxectivos concretos.
As preto de 800 casas reitorais identificadas na arquidiocese compostelá forman parte dun patrimonio estimado en arredor de 4.000 propiedades da Igrexa en toda Galicia. Porén, Sumar lembra que esa cifra non equivale a 800 vivendas dispoñibles: o acordo contempla actualizar o inventario e elaborar un plan director, pero aínda non determina cantos inmobles poderán rehabilitarse, cando estarán listos nin quen poderá acceder a eles.
Un inventario público e prazos concretos
A formación reclama que o inventario inclúa información pública sobre a localización, a titularidade, o estado de conservación e as condicións de habitabilidade de cada propiedade. Tamén pide un calendario de actuacións que permita comprobar os avances e coñecer cantas vivendas se incorporarán aos programas sociais.
Sumar defende que as casas que xa reúnan condicións para ser habitadas se destinen de inmediato a persoas que as necesiten. Ademais, considera que o Arcebispado debe asumir os custos de rehabilitación e reclama a cesión gratuíta e estable dos inmobles para garantir o seu uso residencial social.
A organización tamén avoga por condicionar calquera investimento público a garantías de utilización social a longo prazo. O obxectivo, sostén, é evitar que os recursos públicos destinados a recuperar propiedades infrautilizadas non se traduzan nunha solución residencial duradeira.
Vivenda sen discriminación por crenzas
Movemento Sumar Galicia reclama que o acceso ás vivendas se rexa por criterios públicos de necesidade e sen discriminación por motivos relixiosos. Tampouco considera que deba esixirse unha vinculación previa con Cáritas para poder optar a un fogar.
«A vivenda é un dereito, non unha concesión caritativa», lembra a organización, que advirte de que a atención de emerxencia non pode substituír o acceso a unha vivenda digna e estable. Para a formación, a colaboración entre a Igrexa e as entidades sociais debe ofrecer respostas habitacionais efectivas, con condicións transparentes e garantías para as persoas beneficiarias.
Sumar pide ademais que as demais dioceses galegas expliquen que uso social prevén para os seus inmobles. A proposta esténdese tamén ás propiedades procedentes de antigas empresas públicas, cuxo inventario permitiría estudar a súa posible incorporación a programas residenciais.
Máis vivenda tamén no rural
A organización considera que a recuperación de casas reitorais pode contribuír a ampliar a oferta residencial, especialmente nas zonas rurais, pero advirte de que rehabilitar os edificios non abonda. Para que as vivendas poidan ocuparse de maneira permanente, reclama que estean acompañadas de servizos públicos e transporte que permitan desenvolver unha vida cotiá neses municipios.
A formación insiste en que a mobilización do patrimonio eclesiástico non pode servir para descargar a Xunta da súa responsabilidade de ampliar o parque público de vivenda. A colaboración con entidades sociais, defende, debe complementar as políticas públicas e non substituílas.
OuTraS NoVaS
- Sumar esixe que a Igrexa converta as casas reitorais sen uso en vivendas sociais
- Caballero denuncia que el convenio con la Diputación incluye ahora fotos suyas con la candidata del PP y se pregunta si eso no es prevaricación (Vídeo)
- El Concello de Vigo renuncia a los 5 millones anuales de la Diputación
- El embalse de Eiras tendría agua de calidad para 38 días
- Los trabajadores de Glovo convocan cuatro días de huelga en Vigo
