Vigo | Carlos Díaz
O peche das praias por contaminación fecal volve vén de mover ao BNG a esixir explicacións ao Goberno de Abel Caballero despois do terceiro episodio deste verán, que obrigou a pechar ao baño os areais de Samil e A Punta. A formación nacionalista considera que os sucesivos casos evidencian un problema estrutural na rede de saneamento e reclama unha auditoría completa para localizar os puntos problemáticos e corrixilos.
Así, o portavoz municipal do BNG, Xabier P. Igrexas, rexeita que o Concello atribúa estes episodios ás choivas. Considera que esa explicación é un «insulto á intelixencia» e acusa o Goberno local de non afrontar un problema que, ao seu xuízo, se repite cada verán. «Caen catro pingas e os colectores colapsan, botando augas sen depurar directamente ao mar», denuncia.
Para os nacionalistas, o ocorrido en Samil e A Punta non é un episodio illado. É o terceiro caso de contaminación fecal rexistrado este verán nas praias de Vigo. A finais de xuño pechouse ao baño o areal de Alcabre e a mediados de agosto produciuse outro episodio en A Punta. A estes casos engádese o vertido de augas sen depurar denunciado polo BNG a pasada semana no dique do Náutico.
«É a evidencia dun fracaso estrutural: despois de 30 anos seguimos tratando a ría de Vigo como unha gran cloaca», afirmou Igrexas. O portavoz nacionalista lembrou tamén que a veciñanza de Vigo paga, segundo o BNG, «un dos recibos de saneamento máis caros de Galiza».
O BNG pide unha auditoría de toda a rede
A formación nacionalista vai solicitar a convocatoria urxente do Consello Sectorial de Medio Ambiente do Concello de Vigo para abordar os últimos episodios de contaminación. O obxectivo é que o Goberno local explique as causas dos peches e concrete que medidas pretende adoptar para evitar que volvan repetirse.
O BNG reclama ademais unha auditoría integral da rede de saneamento, unha petición que asegura ter formulado xa en varias ocasións. Os nacionalistas consideran necesario revisar o estado de toda a rede, localizar os puntos polos que se producen as verteduras e executar as actuacións necesarias para impedir que as augas residuais cheguen sen depurar ao litoral.
«Non podemos aceptar que a inacción municipal permita que se continúen a verter augas sen depurar ao mar», advertiu Igrexas.
Para o BNG, as explicacións baseadas exclusivamente en episodios puntuais de choiva non resolven o problema. A formación reclama unha actuación de fondo sobre o saneamento para garantir a calidade da auga nas praias viguesas e evitar novos peches durante o verán.
«Hai que poñer fin dunha vez por todas a este vergoñento espectáculo de cada verán», concluíu o portavoz municipal.
OuTraS NoVaS
- O BNG esixe explicacións ao alcalde polo terceiro peche de praias por contaminación fecal
- La conselleira Vázquez acusa a Vigo de no pagar por Eiras y de perder el 25% del agua: Caballero exige su cese
- «Menos mal que no salí»: dos balcones se desploman de madrugada en Nigrán
- Pintor Colmeiro ya tiene rampas mecánicas: así cambia la calle
- Moaña, Cangas y Baiona siguen en alerta por la escasez de agua pese a las últimas lluvias
