Tras o Mundial chegan as Olimpíadas… ao Porriño: Porrigalia xa está lista

Se España acaba de celebrar o seu triunfo no Mundial de fútbol, O Porriño prepárase agora para vivir as súas particulares Olimpíadas. A conta atrás para Porrigalia xa rematou e a vila converterase esta fin de semana, os días 25 e 26 de xullo, sábado e domingo, nun escenario onde a historia, o humor e o deporte popular se mesturan nunha das festas máis singulares do verán galego.

Durante dous días, as rúas cambiarán completamente de aspecto para recibir a galos, castrexos, romanos, gregos e exipcios, as cinco civilizacións protagonistas dunha celebración que cada ano reúne a milleiros de persoas arredor dunha programación chea de espectáculos, música, gastronomía e actividades gratuítas.

Na presentación oficial da nova edición, o alcalde do Porriño, Alejandro Lorenzo, e o concelleiro de Festas, Bienvenido Estévez, destacaron o carácter colectivo dun evento que non sería posible sen a implicación das asociacións, ANPAS, comerciantes e hostaleiros da vila.

«O Porriño convértese durante unha fin de semana nun lugar onde cultura e deporte van da man«, sinalou o rexedor.

O Rei Castrexo volverá destronar ao alcalde

Un dos momentos máis agardados de Porrigalia volverá producirse o sábado ás 11.00 horas, cando arranque o Gran Desfile desde San Sebastián ata a praza do Concello.

Alí terá lugar o tradicional Destrone do Alcalde, unha representación chea de humor na que o Rei Castrexo toma simbolicamente o control da vila, secuestra ao alcalde e impón unhas novas normas baseadas na festa, os bailes, os cantos e a diversión.

Tras este peculiar «golpe de estado», acenderase a chama olímpica e celebrarase o pregón, que nesta edición correrá a cargo de Galidrone, o proxecto formado polos porriñeses Sergio e Daya, creadores de contidos que difunden Galicia e o patrimonio doutros destinos a través das redes sociais, onde reúnen unha comunidade de máis de 200.000 seguidores.

As probas olímpicas volven ser o gran espectáculo

O corazón da festa serán, unha vez máis, as tradicionais Probas Olímpicas, nas que as distintas civilizacións competirán en retos de forza, habilidade e resistencia física nun ambiente marcado polo humor e a participación.

A primeira sesión celebrarase o sábado ás 19.00 horas na Praza do Cristo, mentres que o domingo, a partir das 11.30 horas, as competicións trasladaranse tamén á rúa Ramón González.

A programación deportiva completarase coa exhibición Crossgalia, prevista para o domingo entre as 20.00 e as 20.30 horas na Praza do Cristo, unha proposta inspirada no universo de Astérix e Obélix.

Como en edicións anteriores, repartiranse 500 cartóns olímpicos que os participantes deberán selar nas distintas probas. Quen consiga completar sete desafíos poderá trocar o cartón por unha consumición gratuíta nos establecementos colaboradores.

Queimada, Bolechas e actividades para toda a familia

A vertente máis tradicional da festa culminará o sábado ás 22.00 horas coa xa clásica Gran Queimada, dirixida polo Rei Panoramix na Praza Arquitecto Antonio Palacios.

O domingo será a quenda da despedida, coa entrega simbólica do bastón de mando ao alcalde e o desfile SubUmbra, que pechará unha nova edición de Porrigalia.

Os máis pequenos tamén terán o seu protagonismo. O domingo ás 18.00 horas, a Praza 8 de Marzo acollerá Gladiator Kids, unha carreira de obstáculos para a que será necesario inscribirse previamente de forma gratuíta.

Ademais, durante toda a fin de semana haberá obradoiros infantís na Praza Antonio Palacios, exhibicións de cetraría no Parque Templete, o espectáculo dos Bolechas o sábado e sesións de pintacaras o domingo.