A gran afluencia esperada leva O Porriño a cambiar de lugar a pantalla da final España-Arxentina

O Concello do Porriño decidiu trasladar á rúa Domingo Bueno a pantalla xigante na que este domingo se poderá seguir a final do Mundial de Fútbol entre España e Arxentina, ante a elevada asistencia de público que se agarda para o encontro.

Inicialmente, a pantalla estaba prevista para a praza do Concello, pero o goberno local optou por cambiar a súa localización ao considerar que a rúa Domingo Bueno ofrece unha mellor visibilidade e maior capacidade, permitindo que máis de 1.000 persoas poidan vivir o partido con comodidade.

O alcalde, Alejandro Lorenzo, explicou que a decisión responde ao éxito da semifinal entre España e Francia, que reuniu a máis de 700 persoas diante da pantalla xigante, así como ao interese amosado pola veciñanza durante os últimos días.

«Queremos que sexa unha festa, que todo o mundo estea cómodo para ver o partido e, oxalá, para celebrar a vitoria», destacou o rexedor.

Festa asegurada antes e despois do encontro

O Concello preparou un amplo programa de animación arredor da final, con festa da escuma, un posto de pintacaras para que os afeccionados poidan lucir as cores da selección española e un DJ encargado de poñer ambiente antes, durante os descansos e ao remate do partido.

Para facer posible o evento, o tramo central da rúa Domingo Bueno, entre a rotonda e a rúa Pío XII, permanecerá cortado ao tráfico desde as 18:30 horas, aínda que se manterá o acceso aos garaxes.

Esta non será a primeira vez que a rúa acolla unha gran cita futbolística. Hai dous anos xa foi o escenario da final da Eurocopa, que rematou cunha multitudinaria celebración. O Concello confía en repetir este domingo aquel ambiente festivo e, independentemente do resultado, a música continuará nas rúas unha vez remate o encontro.