A crise da vivenda en Vigo abriu un novo foco de tensión política tras a resposta da primeira tenente de alcalde, Carmela Silva, á petición de reunión da Alianza pola Vivenda, un movemento integrado por 15 asociacións e sindicatos da cidade.
Os colectivos critican a negativa de Silva a manter o encontro, ao sinalar que non considera necesario reunirse con entidades ás que vincula co BNG, unha afirmación que a Alianza nega e que xerou unha forte contestación social e política.
Pola súa banda o portavoz municipal do BNG, Xabier P. Igrexas, criticou a postura de Carmela Silva e cualificou de “intolerábel” a súa resposta aos colectivos sociais. «Entendemos que desde un luxoso chalet en Toralla e cuns ingresos anuais de máis de 100 mil euros, para a señora Carmela Silva o problema da vivenda non é unha preocupación», afeou.
Igrexas acusou ao goberno local de falta de acción fronte á crise de vivenda e reclamou máis medidas concretas fronte aos anuncios políticos.
Protesta diante da Xunta e demanda de vivenda pública
A Alianza pola Vivenda concentrouse este xoves diante da sede da Xunta para denunciar a falta de alternativas habitacionais para colectivos vulnerables e reclamar un parque de vivenda pública estable e accesible.
Segundo os colectivos, na cidade existen máis de 10.000 persoas demandantes de vivenda pública, nun contexto de prezos de alugueiro en máximos históricos que superan de media os 700 euros.
Críticas á resposta institucional
Os portavoces da Alianza consideran insuficientes as medidas adoptadas polas administracións e alertan de que non abordan o problema de fondo: a especulación no mercado do alugueiro.
Así mesmo, o Sindicato de Inquilinas de Vigo reclama que o Concello solicite á Xunta a declaración de zona tensionada para aplicar o control de prezos previsto na Lei de Vivenda.
Debate sobre vivenda turística e política pública
Os colectivos tamén cuestionan a nova ordenanza municipal sobre vivendas de uso turístico (VUT), ao considerar que non frea a conversión de pisos en aloxamentos turísticos.
Ecoloxistas en Acción reclama unha moratoria de licenzas e o peche das VUT ilegais, mentres outras organizacións alertan da falta de prazas en residencias públicas e da situación das persoas sen fogar.
Outras novas
- Las entradas para ver a Chayanne vuelan: las 500 reservas online se agotan en solo dos minutos
- Zona Franca invertirá 90,9 millones en Vigo en 2027: estos son todos los proyectos aprobados
- Las nuevas rampas mecánicas de Pintor Colmeiro ya están listas: solo falta su apertura al público
- Xa podes levar ao Porriño por bandeira
- Vitrasa, a un paso de seguir al frente del autobús urbano de la ciudad hasta 2036
