A Xunta activou un protocolo de actuación preventiva ante a previsión da chegada de masas de aire procedentes do norte de África que poden elevar as concentracións de partículas en suspensión en Galicia.
Segundo os modelos meteorolóxicos da Consellería de Medio Ambiente e Cambio Climático, este episodio podería provocar -como adiantou vigoalminuto- un empeoramento da calidade do aire en distintas zonas do territorio galego, especialmente nos concellos do norte de Lugo, na provincia de Pontevedra e no interior da Coruña no caso das partículas PM10, así como en Pontevedra e no norte de Galicia no caso das PM2,5.
Estas partículas poden afectar á saúde humana, polo que a Dirección Xeral de Saúde Pública da Consellería de Sanidade recomenda adoptar medidas de prevención mentres dure o episodio, sobre todo no caso dos grupos máis vulnerables.
Limitar as actividades ao aire libre, o exercicio físico intenso e manter portas e xanelas pechadas
Entre as recomendacións figuran limitar as actividades ao aire libre, evitar o exercicio físico intenso, manter portas e xanelas pechadas para reducir a entrada de po nos fogares e empregar máscara e lentes de protección en exteriores cando sexa necesario.
As persoas máis sensibles a este tipo de episodios son aquelas con enfermidades respiratorias ou cardiovasculares, como asma ou EPOC, así como persoas maiores, nenos, nenas e mulleres embarazadas.
O tamaño das partículas determina o seu impacto na saúde. As PM10 poden provocar irritación nos ollos, nariz, boca e gorxa, mentres que as PM2,5, de menor tamaño, poden penetrar nos pulmóns e mesmo no torrente sanguíneo, causando diminución da capacidade respiratoria e agravamento de patoloxías crónicas.
Segundo o Índice de Calidade do Aire (ICA), establécense diferentes niveis de calidade: boa, favorable, regular, mala, moi mala e pésima. A partir dun nivel regular, xa pode existir risco para grupos sensibles, mentres que cando a calidade é mala recoméndase precaución tamén para a poboación xeral.
O protocolo foi activado este xoves e implica a coordinación permanente de distintos departamentos da administración autonómica para o seguimento da situación.
A evolución do episodio e as previsións poden consultarse na web de MeteoGalicia, mentres que información sobre calidade do aire e saúde está dispoñible na plataforma AireSaúde do Servizo Galego de Saúde (SERGAS).
Outras novas
- El Concello mantiene sin autorización la pantalla del España-Bélgica, tras recibir la documentación complementaria de la Diputación
- La pantalla gigante de la Praza da Estrela para ver el España-Bélgica, en duda tras el aviso del Concello a la Diputación
- Vigo activa los preparativos de la Navidad con un contrato de 610.000€ para la decoración luminosa
- Vigo prohíbe la música en directo en los chiringuitos, mientras Nigrán sí la permite con límites
- El PAC de Cangas, al límite: denuncian falta de médicos, más presión asistencial y derivaciones desde Moaña
