Máis de 30.000 traballadores do metal, á folga

As persoas traballadoras do sector do metal da provincia de Pontevedra están chamadas a secundar seis xornadas de folga que comezan este xoves 7 de maio e continuarán os días 13, 14, 19, 20 e 21. A convocatoria, impulsada polas tres centrais sindicais con representación na mesa negociadora —CIG, CCOO e UGT—, chega tras constatar a “nula vontade” da patronal para pechar un convenio colectivo que mellore as condicións laborais e salariais.

A decisión foi anunciada en rolda de prensa en Vigo despois da 13ª xuntanza da negociación, que rematou sen avances. Segundo denunciaron os sindicatos, a patronal non só mantén unha posición inmobilista, senón que mesmo empeorou as súas propostas.

Reivindicacións clave: salarios, xornada e estabilidade

O secretario comarcal da CIG-Industria, Xulio Fernández, acusou á patronal de negociar “sen boa fe” e de intentar impoñer condicións que precarizan o sector.

Entre as principais demandas sindicais figura unha suba salarial superior ao 14% proposto para catro anos, ao considerar insuficiente esta porcentaxe para recuperar o poder adquisitivo perdido pola inflación. “Non se asegura que os salarios recuperen o perdido ao limitar a actualización ao 2% do IPC”, advertiu.

Tamén reclaman unha redución real da xornada laboral —unha das máis elevadas do Estado—, medidas eficaces para facilitar a xubilación anticipada e a regulación da subrogación do persoal para garantir os empregos nos cambios de contrata.

Outras demandas inclúen límites á subcontratación para combater a precariedade e a sinistralidade, a regulación do contrato fixo descontinuo e medidas específicas fronte ás altas temperaturas no verán, especialmente no sector naval.

Tamén no comercio do metal

A mobilización esténdese tamén ao comercio do metal, que emprega a unhas 10.000 persoas na provincia. Neste caso, o convenio leva máis dun ano caducado e as negociacións están paralizadas desde xaneiro.

Os sindicatos denuncian a intención da patronal de eliminar dereitos como a cobertura do 100% desde o primeiro día en caso de baixa médica e de limitar as melloras salariais, sen garantir unha revisión conforme ao IPC.

Escalada do conflito

A convocatoria supón unha escalada no conflito laboral nun sector estratéxico que emprega a máis de 30.000 persoas na provincia. Os sindicatos advirten de que as mobilizacións poderían intensificarse se a patronal non modifica a súa postura e accede a negociar “un convenio digno”.