O Porriño pechou este sábado unha das fins de semana máis multitudinarias do ano tras o éxito da cuarta edición da Fashion Weekend, un evento que encheu as rúas de ambiente, compras e moda e que confirmou a capacidade de convocatoria do comercio local.
A programación arrancou o venres coa Shopping Night, unha xornada na que os establecementos abriron ata a medianoite e recibiron unha gran afluencia de veciños e visitantes, atraídos polos descontos especiais, promocións e actividades programadas no centro urbano.
A música foi unha das grandes protagonistas da noite, coa participación de seis DJ’s que animaron as rúas e contribuíron a crear un ambiente festivo que impulsou as vendas e converteu o centro da vila nun auténtico punto de encontro.
Un desfile multitudinario na Praza Antonio Palacios
O prato forte chegou este sábado coa gran pasarela instalada na Praza Antonio Palacios. Durante tres horas de desfile, conducido por Lucía Rodríguez, o público coñeceu as propostas de moda, complementos e beleza do comercio porriñés da man dos modelos de Small Big Models.
No evento participaron 27 establecementos comerciais e 10 perruquerías e salóns de beleza, que exhibiron sobre a pasarela a oferta e calidade do tecido comercial local.
Un dos momentos máis aplaudidos foi a participación da escola Maison, cuxo alumnado protagonizou varios pases con actuacións integradas que achegaron dinamismo e frescura ao espectáculo.
Sorpresa final cun flash mob
A gran sorpresa da tarde chegou cun flash mob multitudinario que sorprendeu ao público. Unha decena de artistas apareceron desde distintos puntos da praza, incluído o balcón do Concello, creando un espectáculo visual e sonoro que levantou os aplausos dos asistentes.
O alcalde do Porriño, Alejandro Lorenzo, salientou o éxito da cita e asegurou que “O Porriño é unha vila viva e o comercio local é o mellor motor para a cohesión social e económica”.
Pola súa banda, a concelleira de Comercio, Rosa Isabel Alonso, puxo en valor a resposta do público e o esforzo dos comerciantes, subliñando que a Fashion Weekend “xa é unha cita imprescindible no calendario local”.
A xornada rematou coa actuación de Pablo Méndez, que puxo o broche final a unha fin de semana marcada pola moda, a música e a mobilización comercial no centro do Porriño.
Outras novas
- O Porriño arrasa coa Fashion Weekend e converte o centro nun fervedoiro de xente
- Cae en Vigo un clan familiar que explotaba sexualmente a mujeres en un piso del centro, abierto las 24 horas
- Vigo dará hasta 20.200€ a propietarios que alquilen pisos vacíos por un máximo de 750€
- ¿Cómo financiará Aqualia el traslado de colectores de Balaídos
- Tiempo primaveral en Vigo
