Limpiarousa, Surfrider España, Proxecto aMARte e ADEGA impulsaron ao longo da pasada fin de semana, do 27 de febreiro ao 1 de marzo, a II Recollida Simultánea de paus de batea nas praias de Galiza, nun esforzo conxunto por preservar as nosas costas e sensibilizar sobre a problemática da contaminación mariña.
Esta segunda edición do Tarugotón mobilizou máis de 600 persoas voluntarias ao longo do litoral galego, o dobre do que o ano pasado. O voluntariado recolleu preto de 23.000 paus de batea, ademais doutro tipo de lixo acumulado nas praias tras os temporais das últimas semanas.
A iniciativa convidou a todas as persoas interesadas a asumir o reto de recoller o maior número posible de tarugos ou paus de batea nun tempo máximo dunha hora en calquera praia do país. Como xa acontecera na primeira edición, o obxectivo do Tarugotón non foi unicamente retirar estes residuos, senón tamén dar visibilidade á problemática ambiental que supón a presenza destes plásticos nas nosas costas e continuar abrindo canles de diálogo con todos os actores implicados (administracións, empresas e sector bateeiro) para procurar solucións a longo prazo.
Gran cantidade de residuos plásticos nas praias
Este ano, a sensación foi agridoce. O éxito do Tarugotón supuxo unha gran alegría polo volume de xente implicada, pero ao mesmo tempo, evidencia con máis claridade a dimensión do problema. Non só no relativo aos paus de batea, que antigamente non eran de material plástico, senón tamén á gran cantidade doutros residuos plásticos presentes nos areais galegos, especialmente microplásticos, que poñen de manifesto as consecuencias do actual modelo de consumo baseado no «usar e tirar».
Con esta iniciativa, as entidades ecoloxistas queren dar aínda máis visibilidade á necesidade de impulsar cambios urxentes e procurar alternativas máis sustentables e respectuosas co medio ambiente. Limpiarousa, Surfrider España, ADEGA e Proxecto aMARte, amosan o seu agradecemento pola boa acollida desta acción de voluntariado ambiental, que cualifican de éxito. «A participación deste ano amósanos que imos polo bo camiño!».
Outras novas
- El alcalde denuncia el ataque de Louzán a la candidatura de Vigo al Mundial 2030 y el PP le insta a dirigirse a la FIFA
- Este fin de semana, Vigo se pone al volante del futuro: del Tesla Cybertruck al BMW iX3 en el Salón del Automóvil
- Luisa Sánchez agradece al alcalde Caballero su rectificación y le pide más ambición en ayudas a la vivienda
- O comercio do Porriño toma as rúas coa XXXIII feira de oportunidades “Merca na Rúa”
- Máis de 23.000 paus de batea retirados nunha hora: o Tarugotón volve mobilizar o voluntariado nas praias galegas
