A Xunta abrirá o vindeiro día 24 de febreiro o prazo para anotarse nas oposicións de Educación

O Consello da Xunta aprobou o decreto de oferta pública de emprego docente de 2026, que suma 1.601 prazas en 42 especialidades dos corpos de mestres, profesorado de ensino secundario e profesorado especialista de FP. A convocatoria publicarase no Diario Oficial de Galicia nos próximos días e o prazo de inscrición nas oposicións de Educación en Galicia abrirá o 24 de febreiro.

1.388 prazas de novo ingreso

Do total de prazas, 1.388 corresponden a novo ingreso (case o 87 %) e 213 a promoción interna, esgotando o límite do 120 % da taxa de reposición permitida pola normativa estatal (120 prazas por cada 100 baixas). Segundo o Goberno galego, trátase dunha convocatoria “de máximos” orientada a seguir reducindo a interinidade docente e mellorar as ratios nas aulas nun contexto de descenso da matrícula.

Os exames das oposicións de Educación en Galicia desenvolveranse entre o 20 de xuño e o 19 de xullo. As persoas que obteñan praza participarán posteriormente no concurso de destinos provisionais para incorporarse aos centros o 1 de setembro e iniciar o curso 2026/27 xa como persoal funcionario de carreira.

Preto de 21.700 prazas desde 2009

Desde 2009 convocáronse en Galicia 21.698 prazas docentes, co obxectivo de consolidar o sistema educativo galego como o de menor interinidade do Estado, segundo datos da Xunta. A estabilidade do profesorado compleméntase co acordo de mellora laboral asinado con CC.OO., ANPE, UGT-SP Ensino e CSIF, que inclúe medidas sobre horario lectivo, redución de burocracia e complementos salariais, así como coa posta en marcha dunha oficina de apoio ao profesorado e o reforzo da súa condición de autoridade pública.

Áreas reforzadas nas oposicións de Educación 2026

• A oferta distribúese en 476 prazas do corpo de mestres (oito especialidades), 852 de profesorado de secundaria (29 especialidades) e 60 de profesorado especialista de FP (cinco especialidades), ademais de 213 de promoción interna.
• Esta convocatoria reforza especialmente a atención á diversidade, con 136 prazas en Pedagoxía Terapéutica e Audición e Linguaxe no corpo de mestres (46 % máis ca en 2025). Tamén se incrementa o ensino de linguas estranxeiras, con 229 prazas en inglés entre todos os corpos (45 máis ca o ano anterior) e 54 en francés (22 máis).
• Entre as especialidades con maior oferta destacan Educación Primaria (125 prazas), Pedagoxía Terapéutica (95) e Infantil (80) no corpo de mestres; así como Inglés (147), Lingua e Literatura Galega (80), Matemáticas (50) e Sistemas e Aplicacións Informáticas (40) en secundaria. Ademais, refórzanse ámbitos con escaseza de substitutos, como Latín (35 prazas totais) ou Soldadura en FP (14).

Corpo de mestres (476 prazas)

Profesores de ensino secundario (852 prazas)

Profesores especialistas en sectores singulares da FP (60 prazas)