Dous días de folga no ensino galego con 'marchas fúnebres' en 15 localidades

Este martes comezan as 48 horas de folga convocadas polos sindicatos CIG e STEG en todo o ensino público galego, desde educación infantil ata Bacharelato, incluíndo a Formación Profesional e os ensinos de réxime especial, como conservatorios, escolas oficiais de idiomas e escolas de artes.

A convocatoria afecta o persoal docente dependente da Consellería de Educación, Ciencia, Universidades e Formación Profesional e estenderase desde as 00.00 horas do día 16 ata as 24.00 horas do 17 de decembro de 2025.

Servizos mínimos

A Xunta de Galicia publicou este luns no Diario Oficial de Galicia (DOG) a orde pola que se establecen os servizos mínimos, que deberán garantir, como mínimo, a apertura e o peche dos centros educativos durante as dúas xornadas de paro.

Marchas fúnebres

No marco da folga, os sindicatos convocantes desenvolverán este martes marchas fúnebres en 15 localidades do territorio galego. As accións simbólicas terán lugar nas sete cidades e tamén en Monforte, Moaña, Cangas, Bueu, Redondela, Gondomar, Viveiro e Ponteareas, co obxectivo de visibilizar o que cualifican como “o deterioro progresivo do ensino público”.

Outras novas

Vigo

En Vigo están previstas dúas marchas fúnebres pola mañá, ambas con saída ás 10.00 horas desde distintos centros educativos, que confluirán posteriormente nunha manifestación unitaria ás 12.00 horas, con percorrido desde o cruce de Urzáiz con Vía Norte (Vialia) ata os Catro Bancos. A esta mobilización sumarase profesorado da comarca do Morrazo, que realizará previamente marchas nas súas localidades e desprazarase en barco ata a cidade.

Segundo a CIG, as protestas pretenden trasladar as principais demandas do profesorado: a baixada de cocientes no primeiro curso de todas as etapas educativas, a recuperación do horario lectivo anterior aos recortes, a dotación de máis persoal para atender á diversidade e a posta en marcha dun plan efectivo de eliminación da burocracia nos centros.

Os sindicatos lembran tamén que a folga coincide coas sesións de avaliación, polo que parte do alumnado non recibirá os boletíns de notas nas datas habituais.

Marchas fúnebres e mobilizacións: lugares e horarios

Vigo
- 10.00 h:
  - Marcha 1: IES San Tomé → IES Santa Irene
  - Marcha 2: CEP Dr. Fleming → IES do Castro
- 12.00 h: Manifestación desde Vialia (Urzáiz con Vía Norte) ata Catro Bancos
Cangas
- 10.00 h: IES Monte Carrasco → IES A Rodeira → Estación marítima
Moaña
- 10.00 h: IES A Paralaia, con paradas noutros centros, ata a estación marítima
Bueu
- 10.00 h: Percorrido entre o IES Illa de Ons e o CEIP A Pedra (rúa Staffan Morling)
Redondela
- 10.00 h: IES Mendiño → Casa do Concello
Gondomar
- 10.00 h: IES Terra de Turonio, con paradas noutros dous centros, e remate no propio instituto
Ponteareas
- 19.00 h: Manifestación desde o IES Val do Tea ata a Casa do Concello