O Concello do Porriño vén de poñer en marcha a renovación integral do campo de fútbol municipal do Lourambal, unha actuación que permitirá dotar estas instalacións dun céspede artificial de última xeración e mellorar o seu equipamento e iluminación.
As obras, que se atopan en fase de licitación, forman parte do mesmo expediente que inclúe tamén a substitución e mantemento do céspede do campo de Pontellas, empregando o mesmo modelo de xestión. O investimento total ascende a preto de 700.000 euros, financiados integramente con fondos municipais, e contempla tamén o mantemento do novo terreo de xogo durante cinco anos.
Un campo adaptado á alta demanda
A intervención prevé a retirada da herba natural, o acondicionamento e nivelación do terreo con achega de zahorra, e a instalación dun novo sistema de drenaxe e subministración de auga.
O cambio a céspede artificial responde á intensa actividade deportiva que soporta o Lourambal, onde adestran e compiten máis de 400 xogadores e xogadoras do club local.
“O novo céspede garantirá un mellor estado do campo durante todo o ano, reducindo os custos de mantemento e adaptándose mellor ás condicións climatolóxicas”, explicou o alcalde Alejandro Lorenzo, quen salientou que o proxecto “forma parte do plan de mellora das instalacións deportivas municipais”.
Outras novas
- Hallan sin vida a un hombre desaparecido mientras pescaba en Bueu
- Muere la joven a la que su compañero de piso atacó con arma blanca, en Riazor
- Urgen a la Xunta a reparar las “graves deficiencias” del CEIP de A Carrasqueira
- A Deputación impulsa cinco novos obradoiros da Rede SmartPeme+ centrados na capacitación tecnolóxica
- El Concello do Porriño tiene abiertas ayudas de 328.000€ para rehabilitar viviendas en Torneiros
Melloras no equipamento e iluminación
A reforma inclúe tamén a renovación completa do equipamento deportivo: novas porterías de fútbol 11 e fútbol 7, redes, banderíns, banquillos cubertos e pechados lateralmente, así como varandas e sinalizacións renovadas.
Ademais, instalarase un sistema de rego automatizado con canóns emerxentes e depósito enterrado, e renovarase a iluminación do terreo de xogo para mellorar a eficiencia enerxética e a visibilidade.
Primeira fase dun proxecto máis amplo
O orzamento base de licitación da obra civil é de 399.077,73 euros, mentres que o renting para o mantemento do céspede ascende a 292.458,95 euros. O prazo de execución previsto é de catro meses para as obras e dous meses adicionais para a instalación do céspede, polo que o campo estará operativo no verán de 2026.
Esta actuación representa a primeira fase dun proxecto máis ambicioso, que contempla tamén a reforma das gradas e vestiarios, cun investimento estimado en máis de medio millón de euros
