A terceira e última entrega dunha das propostas máis exitosas do teatro galego chega a Vigo esta fin de semana con dúas citas consecutivas: o sábado 4 e o domingo 5 de outubro. Carlos Blanco e Xosé A. Touriñán presentan no Auditorio Mar de Vigo ‘Somos Criminais e punto final’, a derradeira parte dunha triloxía que acadou máis de 100.000 espectadores desde a súa estrea en 2018.
Así, esta nova produción, con dramaturxia de José L. Prieto, Blanco e Touriñán, está dirixida por Tito Asorey e conta cun equipo artístico no que destacan Dani Juncal (iluminación), Carlos Alonso (dirección de arte), Santi Jul (espazo sonoro) e Laura Canto ePaco Abelleira (produción).
Tras Vigo, a xira continuará en Vilagarcía (25 de outubro) e rematará o 1 de novembro na Coruña, cun balance previsto de máis de 10.000 espectadores nesta derradeira etapa.
A outro planeta
Desta, o argumento sitúa ao público en Galicia, a piques do fin do mundo. A nave Arteixo II, capitaneada por Carlos Blanco e Touriñán, debe evacuar a un grupo de elixidos cara a un novo planeta, levando consigo todo o patrimonio humano e cultural que fai única a identidade galega.
As entradas están dispoñibles a través da web oficial do espectáculo- www.somoscriminais.gal-.
