O Bloque Nacionalista Galego (BNG) demanda sacar do “punto morto” a Mancomunidade da Área Intermunicipal de Vigo. Así, os nacionalista cuestionan a falla de actividade deste ente, cun investimento equivalente a un café con leite por habitante o pasado exercicio, e que non ten despregado servizos relevantes durante 33 anos de existencia.
Á vista desta situación, Xabier P. Igrexas, asegura que é a día de hoxe “unha casca baleira, apenas un logotipo”, após a celebración este luns do Pleno da Mancomunidade. Defendeu, pola contra, reactivar un organismo que “pode e debe ser un instrumento útil” para a veciñanza da cidade e dos concellos da contorna, mentres o desenvolvemento da Área Metropolitana non sexa efectivo.
600.000€ para 375.000 habitantes
Deste xeito, a sesión plenaria aprobou as contas do ano 2024 que reflicten, a xuízo da fronte nacionalista, a “parálise” deste organismo: investiu 600.000€ para 375.000 habitantes, un gasto de 1,72€ por persoa, deixando 90.000 euros do orzamento sen executar. Unha falla de acción que, advertiu Igrexas, provocou que a Mancomunidade acumule uns remanentes de case 2 millóns de euros. Na actualidade, o único servizo que desenvolve é un programa mínimo de asesoramento a emprendedores.
“Isto non é xestión; é puro e duro desleixo”
Manifesta o portavoz municipal do BNG de Vigo, lembrando que cada ano o Concello achega 116.000€ das viguesas e vigueses para financiar a Mancomunidade que despois non se utilizan. “O PSOE, con Abel Caballero á fronte, mantén esta entidade en coma profundo por falta de iniciativa, converténdoa nunha estrutura inerte que non vertebra a nosa área metropolitana nin mellora a calidade de vida da veciñanza”, responsabilizou.
Durante a sesión plenaria, o Bloque foi a única forza política en intervir para trasladar propostas para reactivar. Pola súa banda, o PP volveu estar ausente de “maneira irresponsábel”, critica Igrexas, acusando o grupo popular de “teimar en sabotar” a Mancomunidade co obxectivo da súa “morte por inanición”.
“É claro que uns e outros están a priorizar o cálculo partidista sobre o ben común, a mesma lea partidista que matou a Área Metropolitana antes de que chegase a nacer“, engade o voceiro nacionalista en relación ao PSOE e ao PP. Para o BNG, esta situación está a impedir que a área de Vigo poida desenvolver o seu potencial para liderar a Eurorrexión Galiza-Norte de Portugal e converterse no motor de Galiza.
Outras novas
- Uns 80.000 traballadores da construción en Galicia, chamados á folga
- Agentes de la Policía Nacional salvan la vida de un ciudadano en pleno centro de Vigo
- El papel de los abuelos: transmitir a los más jóvenes la simbología de las flores de duelo y las tradiciones familiares
- Reclaman que Alfageme no sea otra operación inmobiliaria
- La Confederación de Empresarios de la provincia rechaza el paro de 2 horas en solidaridad con Gaza
Cooperación entre concellos
Por estes motivos, o Bloque aposta por unha Mancomunidade “actuante e útil” que ofreza mellores servizos á veciñanza, investindo os remanentes en medidas concretas mentres a Área Metropolitana non sexa unha realidade efectiva. “A mellor maneira de empurrar o desbloqueo da vertebración metropolitana que freou o PP desde a Xunta é precisamente empurralo desde abaixo, con feitos”, defendeu Igrexas.
Un camiño que, afirma o portavoz nacionalista, pasa polo diálogo e colaboración entre os concellos para deixar atrás o “hiperlocalismo limitante que nos condena ao illamento”. Dende a fronte nacionalista consideran que o futuro de Vigo pasar por liderar esta realidade metropolitana sumando esforzos para enfrontar retos comúns como a mobilidade da área ou servizos como a xestión de residuos municipais co obxectivo de saír do modelo “obsoleto, caro e insustentábel” de Sogama.
