O equipo directivo do IES Valadares presentou hoxe a dimisión ante a Inspección Educativa e a Dirección Territorial de Educación de Pontevedra. Esta decisión débese a que, a pesar de todos os escritos e informes presentados ás diferentes autoridades educativas, o IES Valadares disporá o vindeiro curso dun docente menos, por ocupar ese posto a segunda orientadora, «absolutamente necesaria nas nosas circunstancias».
Tamén en vigoalminuto
- Gondomar apuesta por el bienestar animal con ‘Proyecto Gato’ y ‘Bai Sen Pulgas’
- «Le doy unos días a la Diputación para firmar el convenio de la piscina de Teis, o la pagamos sólo nosotros»
- Delegados de CIG-Ensino e STEG péchanse en Educación esixindo unha reunión co conselleiro
- A Tarxeta Xente Nova contribúe ao fomento do acceso ao transporte público
- Renfe programa 12 servicios por carretera durante las obras de la vía entre Salvaterra y As Neves
- Concentración para denunciar los efectos de la «masificación» turística
A realidade, apuntan os xa ex responsábeis do centro, é que as aulas son grupos de 30 alumnos/as con aproximadamente un terzo que require unha atención moi específica (síndrome de Down, TEA de diferentes graos, trastornos de conduta, discapacidade intelectual superior ao 33%, altas capacidades, discapacidade visual ou auditiva), «sen esquecer ao resto de alumnado que igualmente ten dereito a unha atención educativa digna e de calidade».
Non é posible atender un aula así
Entenden que, e así trataron de transmitirllelo ás autoridades educativas, non é posible para un docente atender de maneira realista e efectiva un aula como a descrita. «A Consellería de Educación presume de ser un modelo de atención á diversidade, pero xuntar nunha aula a alumnado diverso non é suficiente; non podemos falar de inclusión sen medios humanos para levala adiante«.
Durante estes anos «sumámonos a múltiples programas ofertados pola Consellería de Educación coa intención de enriquecer a nosa oferta e mellorar a calidade educativa». Con todo, «ningún vén acompañado de recursos humanos, senón que se nutren do voluntarismo e vocación do profesorado» o cal, adverten, leva consigo unha importante carga de traballo extra: formación, programación, memorias, xestións ou coordinacións.
«Non podemos seguir asumindo unha responsabilidade para a que nos comprometemos pero para a que non se dan os medios necesarios«
Nin horas de apoio, nin atención individualizada
«Sabemos que moitas familias escollen o noso instituto por recomendación doutros centros ou gabinetes, convencidas de que o seu fillo ou fila recibirá aquí unha atención adecuada. Pero a realidade acaba por impoñerse: non hai horas de apoio suficientes, non hai atención individualizada, non se poden aplicar todas as adaptacións, nin facer un seguimento como sería desexable».
A pesar de todo, subliñan, o profesorado traballa sen descanso, formándose, implicándose e facendo un esforzo enorme, «que nin se ve nin se recoñece». O resultado, conclúen: profesorado desbordado, familias frustradas, alumnado desatendido e un equipo directivo esgotado.
Comunicacións á Consellería, sen resposta
Ao longo deste curso o equipo de Dirección informou, en numerosas ocasións, das necesidades do centro, con entrevistas, escritos e informes detallados, solicitando máis recursos. «Informes que levan horas de traballo e non reciben resposta. Informes que só serven para encher arquivos e aumentar a burocracia, mentres a realidade do centro empeora e co resultado final hoxe coñecido: ningunha incorporación de profesorado para o vindeiro curso».
«Non podemos seguir asumindo esta responsabilidade»
«Chegados a este punto, non podemos seguir asumindo unha responsabilidade para a que nos comprometemos pero para a que non se dan os medios necesarios. A nosa dimisión é unha decisión dura, pero tamén unha denuncia: non queremos ser cómplices dun sistema que precariza a educación pública mentres finxe que funciona ben».
«Reiteramos o noso compromiso coa educación pública e co IES Valadares, ao que seguiremos vinculadas/os como docentes, colaborando en todo o que estea na nosa man».
