O Parque marítimo-terrestre das Illas Atlánticas de Galicia oferta este verán un total de 350 rutas guiadas con aproximadamente 4.000 prazas para coñecer a natureza e a historia das illas que conforman este espazo natural.
Cíes e Ons
Todas as rutas faranse en grupos reducidos co fin de poder ofrecer unha experiencia da máxima calidade. No caso de Cíes e Ons, as persoas interesadas poderán apuntarse tanto de xeito presencial nas casetas de información localizadas nas propias illas como a través da central de reservas para participar nas visitas con guía que se realizarán a diario ata o 15 de setembro.
Estas rutas están programadas todos os xoves ás 12:00 horas durante os meses de xullo, agosto e setembro no caso de Cíes, e os venres á mesma hora no de Ons.
A reserva pódese facer cunha antelación máxima de 15 días e ata 24 horas antes da realización da ruta para reservas en liña, ou no mesmo día en caso de facelo de xeito presencial nas casetas de información.
Cortegada e Sálvora
En canto ás rutas guiadas polos arquipélagos de Cortegada e Sálvora, que serán en grupos de 10 a 15 persoas, só hai opción de reservar a través da páxina web. En Cortegada ofrécense un total de 7 visitas -30 de xuño; 14, 21 e 28 de xullo, e 1, 15 e 25 de agosto-.
Para Sálvora serán 9 rutas -11, 23 e 24 de xullo; 3, 7, 20, 21 e 29 de agosto, e 5 de setembro-. A solicitude a través da central de reservas das visitas a Sálvora e Cortegada deberá facerse, cunha antelación máxima de 25 días e ata 4 días antes da data de realización da ruta.
Cómpre subliñar que, aínda que todas estas rutas son gratuítas, os visitantes deberán facerse cargo do traslado ata a illa. No caso de Cíes e Ons, ao existir transporte regular durante o verán, cada persoa debe solicitar a súa autorización de visita e o seu billete de barco. O guía, pola súa parte, estará esperando nos puntos de información das illas.
Así e todo, no que respecta a Sálvora e Cortegada, que só se poden visitar en compañía dun monitor, o propio Parque Nacional organiza o grupo e contrata o transporte, pero o visitante, logo de reservar a súa praza a través da páxina habilitada, debe pagar o billete á navieira seguindo as indicacións que se lle farán chegar.
10 itinerarios sinalados
Así mesmo, en todas as illas poden realizarse ata 10 itinerarios sinalizados. Cada un está indicado cunha cor e hai folletos explicativos sobre o percorrido tanto na web como nas casetas de información do Parque.
En canto á temática, recollen tanto aspectos naturais como culturais e histórico-etnográficos que axudan a coñecer cada un dos arquipélagos.
