Alejandro Lorenzo, alcalde do Porriño, a concelleira de Comercio, Rosa Isabel Alonso, e a presidenta da Asociación de Comerciantes do Porriño (ACIPOR), Juana Pérez, presentaron a XXIX edición da Feira de Oportunidades “Merca na Rúa”.
29 postos con calzado, óptica, moda, accesorios…e descontos de ata o 80%
O evento celebrarase o venres 15 e o sábado 16 de marzo. “Instalaranse 29 postos de venta na rúa peonil, cunha ampla representación de sectores e produtos. Calzado, óptica, moda infantil e de adulto, mercería a accesorios…serán algún dos artigos que poderás atopar con descontos de ata o 80%”, explicou a presidenta de Acipor.
Horarios…e ollo á choiva
Así, o venres, día 15, ‘Merca na rúa’ estará aberto en horario ininterrumpido de 10:00 a 21:00h. e de 17 a 19h haberá inchables e obradoiros infantís para que os máis pequenos poidan disfrutar mentres os maiores fan as súas compras. O sábado, día 16, só abrirá en horario de mañá de 10:00 a 14:00h.
O alcalde convidou “a toda a veciñanza do Porriño e da contorna a visitarnos e disfrutar, sempre que a choiva o permita, da nosa vila e das importantes ofertas do noso comercio local”.
