O BNG fará da investigación “unha prioridade de país”, porá en marcha nos seus primeiros 100 días de goberno un grande ‘Pacto galego pola ciencia’ e avanzará nunha dobre dirección: máis recursos e estabilidade laboral na investigación científica e tecnolóxica.
Encontro con investigadores na Universidade de Vigo
Así o anunciou hoxe o cabeza de lista do BNG, Luís Bará, nun encontro con persoal investigador dos laboratorios da Facultade de Bioloxía da UVigo, Asegurou Bará que investir en I+D+i “é o mellor salvoconduto para xerar riqueza e favorecer unha economía competitiva e con empregos dignos”. Por iso comprometeu que un goberno liderado polo BNG colocará a investigación científica como unha prioridade de país para que haxa unha estreita conexión entre a investigación e as necesidades de Galiza, incentivando a transferencia de coñecemento ao tecido produtivo nun grande Pacto galego pola ciencia a desenvolver nos primeiros 100 días de goberno.
Intelixencia Artificial, cambio climático, envellecemento ou biomedicina
Na súa intervención fixo fincapé en que o país precisa a ciencia e a innovación para facer fronte a grandes retos como o cambio climático, a xestión de residuos, o envellecemento da poboación, a biomedicina, a intelixencia artificial e as novas tecnoloxías, así como a prestación de servizos na sociedade do benestar, da xustiza social e da preservación do territorio.
O líder da candidatura en Pontevedra subliñou que é preciso reforzar o sistema de I+D+i nas universidades, porque é o principal foco de ciencia e investigación, e maximizar a colaboración entre universidade, empresa privada e administración pública. Salientou que urxe un financiamento estable e suficiente, achegándose á media da Unión Europea, cun programa de recursos humanos integral para todas as etapas da carreira investigadora que achegue estabilidade e planificación ao persoal investigador.
Poñendo números sobre a mesa, destacou que o goberno do BNG destinará á ciencia e innovación o equivalente ao 2,5% do PIB de aquí a 2030 “para sacar a Galiza do furgón de cola onde está hoxe cun investimento que apenas chega ao 1% do PIB”.
Investigadores e investigadoras
En relación á estabilidade laboral, as propostas do BNG pasan por definir a carreira profesional investigadora que debe contar co seu propio estatuto que recolla dereitos e deberes; un plan retorna para recuperar o talento emigrado por falta de oportunidades ou por condicións laborais pésimas; e un organismo de xestión, retención e captación de talento, (INNOGAL) como xa teñen outros territorios como Euskadi ou Catalunya con grandes resultados.
“Se queremos apoiar a investigación científica máis alá da retórica hai que darlle condicións laborais estables e de calidade ao persoal, non se pode esperar unha ciencia de calidade, con precariedade, con temporalidade e con baixos salarios”, alegou Bará.
