Ata dous meses sen subministro de bombona de gas nalgunhas parroquias de Covelo, esta é a situación que viven algúns veciños e veciñas dende que comezou o presente ano 2023. Ante isto, o Concello informa de que «tentou acordar unha solución coa empresa subministradora, GASCÍES S.L. Vigo ao longo das diferentes chamadas e reclamacións enviadas».
“Neste ano 2023 recibimos numerosas queixas dos veciños e veciñas de Covelo de tódalas parroquias referentes á falta da regularidade no subministro das bombonas de gas e propano nos seus domicilios, motivo polo que contactamos en varias ocasións coa empresa”, explica o alcalde, Pablo Castillo.
Contacto coa Consellería de Economía, Industria e Innovación
Sen obter mellora no servizo de reparto, que «durante meses deixa sen subministro a varios barrios, e a outros tantos asiste de xeito desorganizado e con retraso», o alcalde vén de trasladar á xefatura territorial da Consellería de Economía, Industria e Innovación o seu malestar ante a falta de seriedade da empresa subministradora.
Asi, no seu escrito, Pablo Castillo relata que a empresa advirte que deben trasladarse á gasolineira de Paraños para mercar a bombona ante a falta de persoal. “Unha resposta que non imos aceptar xa que non é compatible coas condicións sociodemográficas do noso concello con boa parte da veciñanza de idade avanzada e sen recursos para desprazarse que debe afrontar os custos de pagar un taxi para ir a gasolinera a mercar a bombona de gas”.
Recuperar o reparto
Deste xeito, o Goberno municipal solicita apoio e a intermediación da Consellería para resolver o problema e recuperar o reparto coa normalidade que se viña dando con anterioridade: cada semana nos lugares con máis poboación e cada quince días no resto dos lugares. Dende o Concello subliñan que a maioría dos fogares utilizan a bombona para as cociñas, para a auga quente e para sistemas de calefacción.
Ademais, engaden, «esta situación prexudica ao sector hostaleiro«, que tamén se ve na obriga de desprazarse a mercar as bombonas interrompindo así o seu traballo diario.
