Tamén os «500 amigos do PP» no ‘palco VIP’ de C.Tangana
A portavoz parlamentaria de Cultura do BNG, Mercedes Queixas, denunciou na Cámara galega a «adxudicación arbitraria» do concerto de Muse en Vigo, cun custo de 2,5 millóns de euros, que se suma á tamén «opaca» adxudicación do Festival O Son do Camiño, cun gasto doutros 2,5 millóns nun concurso sen anuncio público.
Discriminación da industria musical galega no Xacobeo
Neste sentido, criticou a política de «turistificación cultural arbitraria, falta de transparencia, arribista da lingua e da cultura galega» do Goberno do PP, que beneficia con 5 millóns de euros a 50 formacións musicais das cales só 4 son galegas. Para o PP os recortes só se aplican á cultura galega e por iso o conselleiro de Cultura evitou sacarse unha foto co cartel da obra de teatro que levaba ese título. «Avergóñanse da súa propia política», ironizou.
120.000€ para 7.000 músicos de bandas populares
Fronte ás cifras millonarias para a industria musical de fóra, só se destinaron 120.000 euros para toda a actividade da Federación de Bandas de Música Popular, con máis de 7.000 músicos, decisións que «exclúen á nosa cultura como a receptora principal do diñeiro público das galegas e galegos». Así, a deputada do BNG advertiu que non existe ningún suposto «retorno millonario« que xustifique este custo nin tampouco estudos que o avalen, «onde está ese informe?», demandou.
500 «amigos do PP» no Palco VIP de C.Tangana
«O seu único criterio é a defensa da cultura elitista» dixo en referencia aos 500 «amigos» do PP no palco VIP do concerto de C. Tangana e ao caso do concello de Baiona, para o que a lingua do País «non é válida» na programación cultural do verán por mor da presenza dos turistas. «Vostedes pensan que quen nos visita non pode ter interese en coñecer unha cultura, é sectario e ignorante de seu, pensa o ladrón que son todos da súa condición».
Cal foi o criterio para adxudicar 2,5 millones a Muse?
Ante a «dilapidación» de cartos que fai o Goberno do PP, Queixas exixiu atender ás preocupacións dos axentes culturais galegos e demandou saber cal foi o criterio de adxudicación do concerto de Muse por 2,5 millóns de euros.
