A presidenta da asociación Solidariedade Galega co Pobo Saharaui (SOGAPS), Mayte Isla, fixo hoxe un chamamento para a doación de alimentos non perecedeiros, destinados aos campos de refuxiados de Tinduf.
![](https://www.vigoalminuto.com/wp-content/uploads/2021/03/IMG-20210329-WA0027-1024x792.jpg)
Caravana Solidaria
Solidariedade Galega co Pobo Saharaui despide este mércores en Ponteareas súa caravana solidaria, posta en marcha logo da suspensión do programa “Vacacións en Paz” como consecuencia da pandemia e o peche de fronteiras que xerou a aparición da COVID19.
Isla insistiu en que a situación do pobo saharaui “non nos pode deixar de brazos cruzados, nin a voluntarios nin á sociedade” e agradeceu a resposta das familias acolledoras, persoas anónimas e institucións, dende o Concello de Gondomar, pasando polo Parlamento, o Goberno de Galicia ou Fondo Galego.
Aceite de oliva, arroz, pasta, lentellas e atún
Mayte Isla, acompañada polo delegado saharauí en Galicia, Mohamed Zerga, achegouse hoxe a Gondomar, onde están preparados os camións que sairán a principio do mes de abril cara ao Sahara. Dende alí pediu ás persoas que queiran facer unha doazón, principalmente de aceite de oliva, arroz, lentellas, pasta e atún, que se poñan en contacto con SOGAPS, nos teléfonos 986 26 26 37 e 678 72 73 82, ata o mércores día 31 de marzo.
A asociación, que lembrou ten presenza en todas as comarcas de Galicia, acudirá a recoller os seus donativos que serán parte desta caravana. A mesma levará ás familias saharianas roupa, calzado, mantas, material informático, escolar e deportivo, ademáis de milleiros de máscaras cirúrxicas.
![](https://www.vigoalminuto.com/wp-content/uploads/2021/03/IMG-20210329-WA0054-1024x461.jpg)