A presidenta da Deputación visitou este mércores, xunto ao alcalde das Neves, Xosé Manuel Rodríguez, e o deputado provincial Santos Héctor, as obras de ampliación do Centro Cultural de Rubiós, unha actuación que conta cun orzamento de 499.457,75€ e que está financiada na súa totalidade pola Deputación. Máis polo miúdo: 399.566,20€ ao abeiro do Plan de Reequilibrio e o restante a través do Plan Concellos.
Carmela Silva mostrouse «encantada de que os concellos garantan os servizos a toda a veciñanza e especialmente neste caso no que falamos dun centro ligado á cultura, un instrumento fundamental de desenvolvemento económico e social».
Silva felicitou ao goberno municipal das Neves por levar a cabo un proxecto transformador que a veciñanza exixe. A presidenta engadiu que «»desde a nosa chegada ao goberno estamos a facer un enorme esforzo para que todos os concellos da provincia teñan recursos repartidos con equidade e nesta liña temos un firme compromiso co concello das Neves, onde investimos preto de 4 millóns durante mandato».
O alcalde das Neves, Xosé Manuel Rodríguez, agradeceu a Carmela Silva a súa xestión, afirmando que «este novo Goberno da Deputación de Pontevedra supón un antes e un despois na xestión pública municipal e nós estamos encantados de que tomasen a valente decisión de crear plans como o Plan Concellos para sexamos os concellos os que xestionamos os cartos en función das necesidades dos veciños e veciñas».
A actuación visitada este mércores dota ao Centro Cultural de Rubiós de tres salas polivalentes. Amais, ampliase o escenario, que incorporará un camerino-almacén; acondicionase a parcela norte como aparcadoiro, e mellorase a accesibilidade e a comunicación dos edificios.
O alcalde explicou que «quixemos aproveitar o Plan de Reequilibrio para construír un instrumento social» e engadiu que «estamos a falar dun equipamento musical que non está no centro da vila, senón que está no centro musical da nosa vila, Rubiós, onde ten sentido que estea. Polo tanto estamos a levar a cabo un gran proxecto que servirá para cubrir as necesidades da nosa veciñanza e que servirá para que a nosa sociedade poida seguir formándose e ampliando o seus coñecementos».
4 millóns de euros nas Neves no que vai de mandato
O goberno de Carmela Silva ten investido no concello das Neves preto de 4 millóns de euros, o maior investimento feito nunca neste municipio na historia da Deputación.
Só co Plan Concellos, a través da Liña 1, As Neves puido financiar estes anos un total de 39 obras por máis de 2 millóns de euros, e ao abeiro da Liña 3 de Emprego o goberno local puido contratar a 57 persoas desempregadas para traballar no concello.
Amais, co vixente Plan Concellos 2019, As Neves dispón de máis de medio millón de euros (556.434,20 euros), un 2,9% máis que en 2018.
