O cadro de persoal de HPS Industrial Jobs e Logistic Packaging, empresas de carretilleiros que traballan para a compañía de automoción viguesa GKN Driveline, mobilizarase este xoves 19 para reclamar a aplicación do convenio do Metal na súa integridade, o que pasa pola equiparación salarial co resto de traballadores.
Segundo explican dende a representación sindical dos arredor de 80 empregados , coa concentración que terá lugar diante das instalacións de GKN na Avenida Citroën de 1 e cuarto a 2 e media da tarde queren reclamar a aplicación íntegra do convenio provincial do Metal, o que suporía un considerábel aumento de soldos.
Até hai catro anos a empresa aplicáballes o convenio de Comercio de Artes Gráficas, mais unha sentenza que chegou a finais de 2014 tras unha denuncia da CIG recoñecéuselles o dereito a gozar das condicións laborais establecidas no convenio provincial do Metal de Pontevedra. Dende entón as condicións laborais están equiparadas, a excepción dos salarios.
Diante disto, o persoal decidiu en asemblea levar a cabo mobilizacións e presentar demandas contra as empresas por cesión ilegal de traballadores, ao tempo que non descarta convocar paros no mes de setembro.
