A sede de Turismo Rías Baixas da Deputación de Pontevedra acolleu este venres a presentación da XXI Festa do lacón con grelos de Cuntis, que terá lugar o vindeiro domingo 18 de febreiro. Ao acto acudiron o deputado provincial David Regades e o alcalde de Cuntis, Manuel Campos.
Esta festa, declarada de interese turístico galego en 2010, volverá a reunir a milleiros de persoas e acollerá actividades de todo tipo dende este mesmo fin de semana. Así, Cuntis será o escenario durante estes días un concurso de tapas con lacón, diferentes obradoiros, un desfile e concurso de Entroido, o velorio e enterro do chapante e, como xa comeza a ser tradición, o “Vespalacón”, que chega a súa décima edición.
O deputado de Cooperación, David Regades, en primeiro lugar enxalzou á vila de Cuntis e cualificouna de “moi fermosa, como tamén o é a súa xente, ata o punto de que nela a ninguén o consideran estranxeiro”. Tamén manifestou Regades o firme compromiso da institución provincial con este festexo, “que conta con 21 anos de vida e que amais da gastronomía, amais do lacón con grelos, conta cunha ampla oferta como poden ser os encontros de Vespa e a aposta da vila pola cultura”.
O deputado de Cooperación subliñou que “todas as pontevedresas e pontevedreses que nos despracemos ata Cuntis poderán desfrutar dos festexos e tamén da súa gastronomía, paisaxe, termalismo e a gran xente que vive en Cuntis e que fai que se vivan experiencias incribles na vila”. Ao respecto, David Regades puxo en valor a importancia das experiencias para o turismo, destacando que “estou convencido de que o xornalista do Guardian que foi a Cíes e dixo que Rodas era a mellor praia do mundo o fixo porque alí viviu unha grande experiencia e eu aquí, en Cuntis, sempre que veño vivo grandes experiencias e estou seguro que tamén as vivirán as persoas que acudan á festa do lacón con grelos”.
Pola súa banda, o alcalde de Cuntis, Manuel Campos, lembrou a traxectoria histórica da festa: “todos nos podemos acordar como comezou e como pouco a pouco foi facéndose oco no panorama turístico e gastronómico de Galicia”. Tamén aproveitou a presentación para agradecer o apoio da Deputación de Pontevedra que “permítenos levar a cabo este mes cheo de actividades que impulsamos dende un concello pequeno.”
Durante a presentación, Manuel Campos tamén deu as grazas “ás asociacións que participan co Concello para o desenvolvemento da festa do lacón con grelos” e anunciou que “desde os servizos Sociais teremos tamén unha mesa solidaria para persoas sen recursos poidan ir a festa.”
