O Goberno local lembra este xoves, nunha nota enviada aos medios de comunicación, en respostas ás declaracións do presidente do Goberno de Galicia, que “é a Xunta a que garante que a auga de Vigo é potable ao 100%”. Isa é reponsabilidade da Xunta de Galicia, indican dende o Concello.
O Goberno Caballero sinala que “no ano 2011, a Xunta a petición de Vigo, garantiu un transvase de emerxencia que nunca fixo, na Coruña en cambio si que o fixo. Agora ten que facer aquel transvase por urxencia, ante esta neglixencia, e vai ser Vigo quen pague o 80% do custo para dar auga a Redondela, Soutomaior, Moaña, Cangas, Nigrán, Mos, Gondomar, Porriño e Salceda”.
Así mesmo, engade que a Administración Galega cobra as vigueses un canon de auga de 5,5 millóns de euros e pregúntalle ao presidente Feijóo, “onde están?”.
O Goberno municipal pregunta tamén ao xefe do Executivo galego, “onde está o trasvase de 2011?, cre o señor Feijóo que a potabilizadora de Redondela ten que pagala Vigo? Cre o señor Feijóo que a potabilizadora de Moaña ten que pagala Vigo? E tamén ten que pagar Vigo a potabilizadora de Cangas? Vigo dá auga potable a todos estes municipios, de xeito que marcha para fóra do seu termo municipal o 17% da auga potabilizada, por iso a potabilizadora é supramunicipal”, e subliña que “no ano 2013 a Xunta de Galicia presupostou unha potabilizadora para Vigo e nunca máis se soubo dela”.
A xuizo do Goberno municipal “o señor Feijóo ten un problema: ten as competencias de subministración de auga en alta aos concellos, e temos que facelo os propios concellos porque de Feijóo nin se sabe nin se lle espera. É o maior fracaso de xestión dun político. Non é capaz de facer fronte ás súas responsabilidades”.
O Goberno local salienta que “en Vigo, nestes anos, renovamos 300 quilómetros de tubaxes, melloramos a potabilizadora e pagamos a Feijóo, desde que é presidente da Xunta, 45 millóns de euros de canon de auga. Onde están?”
Para os responsábeis locais o problema de Vigo é de escaseza de auga na présa de Eiras e o baixo nivel orixina turbidez na auga. Non é a potabilizadora. O responsable de resolver o problema a 35 quilómetros de Vigo é a Xunta de Galicia. “Vigo pode resolver o seu problema simplemente cortando a auga a todos os concellos aos que lla dá. Se Vigo corta a auga da présa pagada por Vigo a todos os concellos que a reciben, o problema queda resolto. Non o facemos, nin o faremos, por responsabilidade”.
O executivo de Caballero acusa a Feijóo de pretender que sexa Vigo quen pague a auga de outros concellos e “oculta a súa incapacidade mesturándoo coa potabilizadora que cumpre esa función potabilizadora en condicións normais para Vigo, Cangas, Moaña e Redondela de forma excepcionalmente boa”.
O Goberno municipal remata afirmando que nestes momentos, a auga de Vigo é potable e así o indican as análises que certifica a Xunta de Galicia. O nivel de potabilidade da potabilizadora de Vigo é idéntico ao do Louro ou ao da potabilizadora de Redondela. “Son eles tamén causantes? Ou é un problema de seca? Ou é Feijóo facendo política?”
