'Qué te cuentas?'

@depo_es impulsa a participación de máis de 100 mulleres de catro concellos no programa ‘Conectadas 2017’

A Deputación de Pontevedra pon en marcha esta semana cinco novas accións formativas dentro do programa “Conectadas 2017”, promovido polo servizo de Igualdade da institución provincial, para catro concellos da provincia de Pontevedra e dos que se beneficiarán en total máis de 100 mulleres destas vilas. Os obradoiros, que están dirixidos a potenciar a participación e promoción das mulleres e a mellorar a súa formación básica, terán lugar nos concellos de Vilanova de Arousa, Catoira, Caldas de Reis e Silleda.

O venres 20 de outubro comeza en Vilanova de Arousa un obradoiro de “Cociña. Menú diario” para 24 mulleres da Asociación de Mulleres Rurais Consumidoras e Amas de Casa Citania de Baión. Pola súa banda, o sábado, 21 de outubro, terá lugar o inicio do curso  “Cestería” no que participarán 16 mulleres da Asociación de Mullers Rurais Ascuas de Catoira.

Xa para a semana que vén, concretamente o luns 23 de outubro, comeza en Caldas de Reis un obradoiro de “Risoterapia” no que se darán cita outras 16 mulleres da Asociación de Mulleres Rurais Santa Lucía de Arcos da Condesa.

O xoves, 26 de outubro, terá lugar o inicio do curso “Cestería” no que participarán 16 mulleres da Asociación de Mulleres de Silleda e, pola súa banda, o venres comezará a acción formativa “Cociña. Menú diario” na que se darán cita 25 mulleres da Asociación de Mulleres Rurais O Campanario de Vilanova de Arousa.

“Conectadas 2017” ten por finalidade mellorar a formación básica das mulleres para favorecer as súas relacións interpersoais e o intercambio de experiencias ademais de contribuír á mellora da súa empregabilidade e ao mantemento no mercado de traballo e reducir a súa brecha dixital mediante a formación nas novas tecnoloxías.

O programa está destinado ás asociacións, federacións e fundacións sen ánimo de lucro que teñan como obxectivo e ámbito de actuación a promoción das mulleres, que apoien o seu desenvolvemento e empoderamento, ao igual que o seu tecido asociativo e a paulatina consecución do obxectivo da igualdade entre mulleres e homes.

Cada unha das asociacións beneficiarias desenvolve unha acción formativa, de 35 horas de duración, distribuídas entre oito bloques temáticos: “Muller emprende” (emprendemento), “Muller e cultura” (dedicado ás artes visuais), “Actualízate” (alfabetización dixital), “Coas túas mans” (traballos manuais), “Porque ti o fas” (xardinería e ornamentación floral), “Súmate ao cambio” (cociña, costura, coidados e dependencia, corresponsabilidade, reciclaxe, bricolaxe…), “Ponte en forma” (deportes) e “Coidados persoais”.

A Deputación de Pontevedra destina a esta edición do “Conectadas 2017” un orzamento de 324.000 €. O pasado ano máis de 5.000 mulleres se sumaron a estas accións formativas que teñen por obxectivo impulsar a igualdade real e garantir o acceso a todos os membros da sociedade á participación nas distintas esferas e actividades.

También te puede interesar