A conselleira de Infraestruturas e Vivenda, Ethel Vázquez, visitou este mércores Redondela para supervisar as obras da Avenida de Vigo, a travesía que une Chapela con Vigo na PO-323, que estarán rematadas o vindeiro verán, o que supón acurtar o prazo marcado inicialmente, previsto para o mes de novembro de 2018.
O Goberno galego aportará o 85% do custe da actuación que rolda os 2,3 millóns de euros, mentres que o Concello de Redondela investirá 369.000€ destinados ás melloras dos servizos de saneamento e pluviais.
Vázquez destacou que as actuacións están xa moi avanzadas, a pesar da súa complexidade técnica, sobre todo, no que se refire ás beirarrúas, onde o grao de execución rolda o 40%, estando máis adiantadas as da marxe esquerda. Así mesmo, remarcou que trátase dunha obra moi demandada polo Concello de Redondela, xa que supón un importante beneficio para os veciños e para o comercio da zona.
O obxectivo máis destacado desta actuación, que ten unha lonxitude dun quilómetro, é facer a zona máis accesible e máis segura, para o que se actúa na intersección que leva a Pescanova, para facilitar a saída e entrada dos camións ás industrias da contorna en condicións máis seguras.
Tamén se está a reforzar a seguridade dos peóns e a súa mobilidade, coa renovación integral das beirarrúas, para facilitar o tránsito dos veciños e visitantes nesta zona tan concorrida na que, xunto co mercado e a alameda, se asentan gran número de establecementos comerciais.
Ethel Vázquez tamén explicou que se aproveitou para mellorar a totalidade dos servizos urbanos, atendendo á petición feita polo Concello e ao seu compromiso de financiar parte destes traballos. Trátase dun proxecto ambicioso que porá en valor toda esta zona, contribuíndo á súa revitalización e un maior dinamismo
