A CIG segue adiante coa campaña de mobilizacións que desenvolve dende hai máis dun ano en apoio do persoal de Servicarne: autónomos dependentes que traballan en empresas pertencentes ao grupo Coren, como é o caso da porriñesa Frigolouro.
Máis dun cento de delegados sindicais participaron na concentración convocada diante das instalacións centrais da cooperativa ourensá. Coa protesta desta mañá a central pretende forzar á dirección a negociar melloras laborais para estes falsos autónomos, que padecen unhas condicións “do século XIX”.
A mobilización tivo lugar de 11:30 a 12:30 horas nas inmediacións das oficinas centrais do grupo Coren, situadas na parroquia ourensá de Santa Cruz de Arrabaldo. No lugar despregouse unha faixa na que se podía ler “Non á explotación laboral en Coren” e berráronse consignas denunciando as condicións laborais que padece o persoal autónomo dependente da empresa Servicarne.
