A presidenta da Deputación de Pontevedra subliñou este marte o profundo agradecemento ao Centro Galego de Lisboa por acoller a presentación de Rías Baixas “Moito por descubrir”. Afirmou sentirse moi emocionada por estar nun centro galego “onde tantos homes e mulleres que emigraron de Galicia deixaron un anaco de todos e todas nos, alí onde se asentaron”.
Carmela Silva subliñou que os galegos “cando estamos en Portugal nos sentimos na nosa casa aínda que as fronteiras políticas moitas veces nos alonxaron”. A presidenta subliñou que compartimos con Portugal moitas cousas “pola nosa cercanía ao Océano Atlántico” polo que é un “enorme orgullo” estar hoxe en esta cidade que é unha das mellores de Europa “pola que moitos galegos son sentimos moi atraídos” e “nos sentimos encantados de mostrarlles aquí o noso destino turístico, Rías baixas”.
Foi o presidente da Casa de Galicia en Lisboa, Alvaro Moreira, quen agradeceu á Deputación de Pontevedra, que escolleran esta localización para presentar o destino turístico das Rías Baixas animando a todos os presentes a visitalo.
Silva resumiu a campaña de promoción en tres activos moi poderosos. “Os Festivais Rías Baixas, unha referencia cultural e musical xa consolidada e cunha enorme proxección nacional e internacional; os seis camiños de Santiago que cruzan a provincia, nos que podemos ver moito do que podemos mostrar ao mundo nas Rías Baixas; e a cultura do viño. Temos o orgullo de contar nada menos que coa capital vitivinícola de Europa este ano, o municipio de Cambados”.
Precisamente referíndose ao camiño portugués a Compostela, que é un eixo da campaña de promoción, Silva subliñou que “nas Rías Baixas hai ata seis Camiños, que cada ano percorren máis peregrinos. O ano pasado foron 65.000 e este superarase holgadamente esa cifra. Compartimos con Portugal dous deles, aos que temos especial agarimo. Son o Camiño Portugués tradicional, un dos preferidos por quen se dirixe cara a Compostela, e o Camiño da Costa, unha variante desde o Río Miño camiñando xunto ao Océano e a Ría de Vigo. As Rías Baixas son o paso natural dos nosos irmáns portugueses cara a Santiago e estamos orgullosos de que coñezan a nosa terra, cultura e patrimonio. Ao longo da historia os camiños foron un gran vínculo social, económico e cultural entre Galicia e Portugal e queremos impulsalo con máis forza aínda”.
A presidenta animou aos veciños lusos a achegarse as Rías Baixas para desfrutar da música dos festivais porque “este ano, ademais, apostamos aínda máis forte porque pasamos de sete festivais a oito máis un. Nas Rías Baixas quen nos visita poden pasar todo o verán de festival en festival: desde o 30 de xuño ata o 9 de setembro temos cita practicamente todas as semanas. Cada festival é único e ten o seu estilo propio, pero todos eles celebran actividades para todos os públicos”.
A presentación na Casa de Galicia en Lisboa concluíu cunha degustación de produtos da provincia de Pontevedra baseada nas propostas do festival VigoSeaFest, que organiza a Cooperativa de Armadores de Vigo, para a promoción de peixes pouco coñecidos a cargo do chef Adrián Albino do restaurante “Niño Corvo”.
Tamén os presentes puideron desgustar viños da adega “Quinteiro da Cruz”, preparados de conservas “Os Peperetes”; galletas Albariñas; e queixos de Dona Cobiña e as marmeladas de Amorodo, dúas empresas da comarca do Deza.
