O ‘Tramabús’ de Podemos empezou o seu percorrido por Galicia no Hospital Álvaro Cunqueiro e cun ‘convidado especial’ máis ao autocar: o presidente do Goberno galego, Alberto Núñez Feijóo, que viaxa no cristal de diante do vehículo.
A inclusión do presidente Feijóo está xustificada, segundo a secretaria xeral de Podemos en Galicia, Carmen Santos, porque representa a “corrupción legalizada”. Ao xuízo de Santos, o Partido Popular empregou “milleiros de millóns de cartos públicos, dos galegos, para facer un mal uso por medio da privatización da sanidade coa finalidade de favorecer os intereses das multinacionais e facer negocio co dereito á saúde”.
O ‘Tramabús’ segue a súa ruta e este sábado estará en Lugo, con Antón Gómez Reino, Portavoz de En Marea no Congreso, e Paula de Santiago, Portavoz do Círculo de Sarria. O acto será ás 9:15 horas na Avenida Rodríguez Mourelo e non hai previstas declaracións a medios.
O vehículo seguirá a Mugardos, A Coruña e Santiago onde será o ‘acto final’ da viaxe por Galicia, na Explanada de San Caetano, sobre as 6 menos cuarto da tarde.
