O Goberno local levou este mércores ao Pleno da Corporación a aprobación inicial da modificación da Ordenanza, que saíu adiante co apoio dos grupos do PSOE e Marea e a abstención do PP. Ábrese agora un prazo dun mes de exposición pública para presentar alegacións, que serán resoltas antes de volver a Pleno para a aprobación definitiva.
A concelleira de Medioambiente, Chus Lago, explicou que o Concello conta con 5.000 sinaturas que respaldan a iniciativa municipal de designar praias ás que poidan acceder os cans tamén nos meses de verán, de xuño a setembro, ambos incluídos, datas nas que actualmente está prohibido.
Unha vez o cambio da normativa estea en vigor, o Goberno local asignará os areais aptos para cans no verán, que terán que ser ratificados por outras administracións. Lago indicou que Costas establece requisitos a cumprir, como a non existencia de marisqueo no entorno da praia ou a posibilidade de empregar maquinaria para a súa limpeza.
O Partido Popular abstívose na votación e anunciou a presentación de emendas ao texto. O PP estima «necesaria» a actualización da norma por «insuficiente» e solicitou acompañala de campañas de concienciación.
Os populares propuxeron melloras na regulación, na identificación dos animais e na eliminación do sacrificio como opción, e puxo en dúbida que a modificación da ordenanza estea lista para este verán.
