O colectivo de xubilados e pensionistas da CIG convoca concentracións para este mércores, día 5 de abril, para denunciar as “consecuencias das reformas dos gobernos do PSOE e do PP, nos anos 1997 e 2011”, reclamar a “revalorización anual das pensións consonte o IPC”; garantías para a sustentabilidade do sistema público e exixir un incremento das mínimas, equiparándoas, polo menos, ao importe do Salario Mínimo Interprofesional (SMI).
As mobilizacións, que se insiren na campaña pola recuperación de dereitos laborais e sociais que desenvolve a CIG desde o pasado mes de decembro, terán lugar ás 11:00 horas diante das oficinas do INSS en Vigo, Santiago, Ferrol e Pontevedra. En Lugo está prevista para as 12:00 horas, tamén diante do INSS.
O colectivo de xubilados e pensionistas denuncia que coas reformas dificultouse cada vez máis o acceso ás pensións contributivas, rebaixáronse as das que acceden a elas e retrasouse a idade efectiva de xubilación.
Xunto a isto denuncian que desde o ano 2013, a maioría absoluta do PP decidiu suprimir a actualización das pensións que se viña facendo en función da desviación do IPC e fixando como tope o incremento do 0,25%, provocando deste xeito o empobrecemento do pensionistas. “Esta mesma pretensión tena o denominado factor de sustentabilidade, aplicábel a partir do 2019, que vai minguar aínda máis os ingresos ao quedaren vinculados en función do incremento da esperanza de vida”, advirten.
