Deportes Vigo al día

O Goberno local asegura que o PP quere parar a reforma de Balaídos

O Goberno local denuncia, nun comunicado,que “a chamada Asociación en Defensa de Vigo, próxima ao Partido Popular, de cuxa xunta directiva forman parte, entre outros, unha destacada militante deste partido e outras persoas ben coñecidas por Alfonso Rueda-, que incluso actuaron como anfitrións en sendas conferencias pronunciadas en Vigo polo vicepresidente da Xunta”,presentou un recurso contra a adxudicación da obra de Río no estadio de Balaídos.

Este colectivo, asegura o Goberno local, trata de boicotear este proxecto solicitando a paralización e a suspensión temporal do procedemento ao Tribunal Administrativo Central de Recursos Contractuais, dependente do Ministerio de Facenda e Administracións Públicas.

Entre outras cuestións, continúa o comunicado,argumentan que pretenden impedir que ”se lle estean agasallando aos inversores estranxeiros que veñan adquirir a Sociedade Anónima Deportiva máis de seis millóns de euros das arcas municipais”.

Con estes “argumentos falaces tratan de paralizar a unha remodelación histórica do estadio municipal de Balaídos”.

O Concello de Vigo mantén o seu “compromiso total coa reforma desta infraestrutura porque esta cidade, como apoio ao equipo, quere ter no seu campo de fútbol un emblema que traslade a imaxe que a cidade merece”.

O Goberno local engade que Vigo está a experimentar un cambio excepcional nestes anos e “estes farsantes non nos van facer variar nin o rumbo nin a nosa determinación. Vigo é agora unha cidade distinta na que atención ao deporte en xeral e ao Celta en particular vai proseguir co seu percorrido”.

As obras do estadio continuarán, subliña o Goberno local, porque “o máis importante, o orzamento, xa está aportado polo Concello e pola Deputación de Pontevedra. Polo tanto, despois do verán teremos reformada a grada de Río, tal e como estaba proxectado”.

“O Partido Popular, esta vez, a través dunha suposta asociación, segue intentando paralizar a acción desta cidade, nesta ocasión, tratando de retrasar as obras nesta grada de Balaídos. Volverán a fracasar e lle seguiremos esixindo responsabilidades ao PP de Vigo e ao PP de Galicia”.

También te puede interesar