A CIG Saúde ven de denunciar a confirmación por parte da Xerencia da área sanitaria de Vigo que se paralizarán as vacantes que estaba previsto cubrir con persoal estable a partires do mes de setembro despois de que se tivera que adaptar o cadro de persoal ás necesidades xeradas polas diferentes actividades e organización funcional trala posta en marcha do Hospital Álvaro Cunqueiro.
Dende o sindicato aseguran que esta falta de consolidación do persoal necesario para realizar as actividades diarias obriga aos traballadores a permanecer «nunha situación da máis absoluta precariedade sen poder manter estabilidade nun servizo, perdendo dereitos de vacacións e descansos, incluídos os obrigatorios entre xornadas do persoal que fai contratos por días durante o verán, e perpetuándonos nunha situación de inestabilidade» que afecta ao funcionamento de todos os servizos, onde «o persoal estable ten que formar persoal novo cada pouco tempo e cando está formado finaliza o contrato e o cambian de lugar».
Os representantes sindicais aseguran que este problema se traslada a moitos dos servizos da área sanitaria que manteñen o traballo en base a «contratos precarios mediante acúmulos de tarefas ou substitucións por días soltos de prazas estruturais xerando grandes problemas na organización e no traballo das plantas afectadas».
Desde CIG-Saúde demandan que se transformen en vacantes ás prazas necesarias para o funcionamento dos centros hospitalarios de Vigo e que esas prazas sexan cubertas por persoal interino mentres non poidan ser ofertadas a concurso de traslados e Oferta Pública de Emprego posterior.
