A Deputación de Pontevedra quere levar a iniciación no deporte dos nenos e nenas entre 5 e 15 anos de toda a provincia de Pontevedra a través dun novo proxecto, as ‘DEPOrte Escolas’. Serán escolas deportivas cun novo modelo que «garanta unha maior equidade e transparencia» no seu proceso, segundo salientou a presidenta da Deputación, Carmela Silva.
As ‘DEPOrte Escolas’ non competirán coas escolas deportivas montadas polos propios concellos, pero fará unha oferta para que todos os nenos poidan iniciarse no seu deporte favorito. As inscricións comezarán o vindeiro luns 5 de setembro a través dun sinxelo trámite de descarga dun formulario que poderá entregarse vía mail ou en calquera dos rexistros das oficinas da Deputación.
As clases arrancarán o vindeiro 3 de outubro e os horarios iranse publicando na páxina web da Deputación a medida que se vaian completando os 15 inscritos en cada disciplina: balonmán, fútbol, taekwondo, patinaxe, judo, rugby, marcha, natación, piragüismo e baloncesto.
