A Oficina de Dereitros Sociais (ODS) de Coia convoca para este xoves, día 16, ás 11 da mañá, nas oficinas de Aqualia, na rúa Venezuela 4, unha concentración baixo o lema: ‘A auga é un dereito. Os dereitos non se cortan!’, para denunciar que “moitos fogares de Vigo fican sen auga por non poder pagar”.
ODS Coia subliña que “nas últimas semanas o Alcalde e o concelleiro de Fomento declaraban nos medios que en Vigo non había cortes de auga por impago. Isto falan mentres no departamento de Benestar Social, recoñecen que todos os meses dende o Concello se pagan facturas e reenganches de auga de fogares empobrecidos”.
Por iso, aseguran dende esta asociación, “volvemos á rúa para berrar que Aqualia segue a facer negocio cunha necesidade básica, sen que o Concello faga nada. Para esixir ao Concello que garanta a subministración a todas as veciñas e veciños”.
Por iso o xoves queren esixir que se fagan públicos os datos dos avisos de corte e dos cortes de auga que se producen na cidade; o “cese inmediato dos cortes de auga por impago” e, por último, a aprobación dunha ordenanza municipal na que se garanta a subministración, por medio dunha exención para fogares sen recursos suficientes: “Quen non ten non paga”.
