O Club Balonmán Porriño ven de asinar coa Deputación de Pontevedra un convenio de colaboración valorado en 30.000 euros para a promoción do deporte e para a cooperación e colaboración no desenvolvemento de proxectos deportivos que incrementen a formación deportiva, cultural e social dos escolares da provincia pontevedresa.
A través deste convenio, o club de balonmán cederá a todos aqueles escolares ou alumnos das escolas deportivas invitacións para ver de xeito gratuíto os partidos do Club Balonmán Porriño. Trátase dun compromiso que a Deputación asume con interese sobre todo, como explicou a presidenta, Carmela Silva, canto se trata dun club que «aposta pola igualdade entre mulleres e homes e que conta cun equipo, o feminino, que compite na División de Honra, a elite do balonmán español».
