RGPD - Cookies
Vigo al día

Persoal de Dalphimetal/TRW de Vigo mobilízase contra o despedimento de 28 traballadores

2015 11 11 DespidosDalphimetalTRWVigo00O cadro de persoal de Dalphimetal/TRW iniciou hoxe as mobilizacións para rexeitar o despedimento de 28 traballadores e concentrouse ás portas da empresa de automoción situada no polígono vigués do Caramuxo. As rescisións de contrato chegan tras o convenio asinado por CCOO, UGT, CUT e Independentes que a CIG rexeitou. Dende a central nacionalista denuncian que a compañía está a deslocalizar carga de traballo a Portugal a pesar de recibir subvencións públicas.

O presidente do comité, da CIG, explicou que durante a negociación do convenio a empresa trasladou a necesidade de realizar 45 rescisións de contrato, “polo que no acordo final introduciron unha cláusula na que se blindaba os empregados de Dalphimetal España con antigüidade anterior a setembro de 2015”. Pero unha vez asinado o convenio a dirección decidiu traspasar o persoal de Dalphimetal Seguridade a Dalphimetal España, quedando deste xeito sen antigüidade e posibilitando o seu despedimento. “Dez días despois de asinar o convenio os compañeiros comezaron a recibir as cartas de despedimento”, lamenta.

A CIG decidiu non asinar o convenio ao entender que posibilitaría o despedimento de persoal, tal e como agora está a suceder. “Tamén nos opuxemos porque pactaron que tivese unha duración de cinco anos e contemplaba unha redución salarial, a excepción dos últimos dous anos, nos que se aumentarían os soldos un 1,5 e un 2%”. Ademais, o acordo establece que a empresa pode facer novas contratacións pagando 1.200 euros anuais menos a cada traballador. “Dixemos que non porque hai que lembrar que no anterior convenio xa se pactara o despido de 120 persoas”.

Dende a central indican que os representantes da compañía intentaron acordar co comité (5 delegados da CIG, 3 de CCOO, 2 da UGT, 2 de Independentes e 1 da CUT) as rescisións dos 28 contratos, “pero nós opuxémonos e instámolos a que conseguisen carga de traballo e deixasen de deslocalizar produción a Portugal, onde teñen xa tres fábricas; pero seguen a derivar traballo fóra de Galicia a pesar de que reciben subvencións públicas”.

Diante disto, o comité de empresa manterá mañá unha xuntanza para deseñar un calendario de mobilizacións que incluirá protestas diarias diante das instalacións da empresa e o sábado convocará unha asemblea de traballadores na que se proporá a convocatoria dunha folga indefinida.

También te puede interesar