O bispo de Tui-Vigo asinou este luns un decreto de supresión da Orde e Mandato de San Miguel Arcángel, logo de que o seu líder e fundador, Feliciano Miguel Rosendo da Silva, fose enviado a prisión provisional e sen fianza, imputado por asociación ilícita e abusos sexuais.
Luis Quinteiro sinala que na actualidade esta organización contaba con 26 membros baixo a responsabilidade «directa e inmediata» dun comisario, tras a expulsión do seu fundador por parte das autoridades eclesiásticas. O bispo aduce como motivo da supresión de Orde e Mandato o «grave escándalo causado ultimamente por algúns membros que se deron de baixa».
O bispo manifesta o seu «fondo pesar polo grave escándalo que ultimamente membros desta asociación, que se deron de baixa a raíz do nomeamento do comisario, causaron non só nesta Diocese, en que exerceron a súa actividade, senón en toda España, con grande repercusión mediática».
Quinteiro, logo de lembrar que a secta desenvolveu as súas actividades como asociación privada de fieis dende 2003 e como asociación pública de dereito diocesano dende 2009, subliña que, por esta «causa grave» decretou a supresión da mesma.
