A conselleira do Territorio subliña que é «unha alternativa viable» quitarlle a concesión da Autoestrada AP-9 a Audasa

A conselleira de Medio Ambiente, Territorio e Infraestruturas, declarou este sábado que é «unha das alternativas viables» retirarlle a concesión da AP-9 a Audasa por estar na Lei de concesións.

Ethel Vázquez subliñou, en declaracións aos xornalistas, que a autoestrada do Atlántico, que considera unha «infraestrutura troncal en Galicia», é competencia do Ministerio de Fomento e agradeceu o «traballo que está a facer o ministerio, porque a ministra xa mandou inspectores, abriu un expediente e mandou unha mensaxe clara, unha mensaxe que pode resolver a concesión».

A ministra Pastor advertiu, hai unha semana, a Audasa, con abrirlle un «expediente de anulación da concesión» se non solucionaba a «reiteración de atoamentos» neste vial. Así mesmo, Fomento enviou inspectores para comprobar «in situ» a situación nas peaxes, unha medida que «non se fixo nunca na historia da autoestrada», dclarou a ministra.

A conselleira asegurou que o Goberno galego fará «todo o que estea nas súas mans e na lei», para «garantir o servizo aos cidadáns».