A Fiscalía do Tribunal Superior Xustiza de Galicia dirixirá á Fiscalía Xeral do Estado unha proposta para pedir a lexitimación do Ministerio Fiscal para que poida intervir en procesos de demandas colectivas, como no caso dos afectados polas preferentes e subordinadas.
Así o adiantou o fiscal superior de Galicia, Carlos Varela, en declaracións aos medios antes de ofrecer unha conferencia no xantar-coloquio do Foro de Dereito Alumni Pontevedra de la Universidad de Navarra, este xoves en Vigo.
Varela salientou que tras o sucedido cos preto de 40.000 afectados polas participacións preferentes a Fiscalía Superior de Galicia comprobou que o ordenamento xurídico procesual «ten unha serie de lagoas cando se trata de abordar os conflitos de masa, cando as persoas prexudicadas son un grande colectivo de centos ou miles».
O fiscal xefe indicou que a lei procesual «está pensada máis ben para dirimir conflitos de persoas individuais, entre particulares, e non se adapta ben á resolución deste tipo de conflitos en que están implicados tal cantidade de persoas». Igualmente, sinalou que o proceso civil tamén ten «dificultades para canalizar este tipo de demandas colectivas».
