A voz de Carlos Casares, falecido hai 12 anos, guiará unha ruta literaria por lugares da cidade de Ourense e Castro de Beiro relacionados coa súa vida e obras, grazas á reprodución de discursos e lecturas que poderán escoitarse mediante códigos QR en cada placa señalizadoras, enlazados a unha páxina de Internet.
O percorrido proxectado iníciase no soar onde antes estaba o hotel Parque e onde Casares coñeceu e participou no faladoiro de Vicente Risco, para seguir cunha segunda placa, tamén no ámbito do parque de San Lázaro, segundo detallou Monxardín, cunha placa sobre o actual edificio onde antes estivo a casa natal de Carlos Casares.
Os textos que acompañarán ao inicio do percorrido son do libro ‘Un país de palabras’ e outro publicado no xornal local por Casares sobre unha viaxe a Suecia en 1972, no que fala do seu ámbito familiar.
O edificio da Torre de Ourense será a terceira parada para aludir á biografía de Casares sobre Curros Enríquez en ‘Os escuros soños de Clío’, obra que Monxardín sitúa entre o realismo máxico e a historia inventada asociados habitualmente a Álvaro Cunqueiro e Eduardo Blanco Amor.
