O 061 asistiu a 106 persoas debido a 72 accidentes de tráfico rexistrados nas estradas galegas durante a ponte festiva de Reis. A Central de Coordenación recibiu 87 chamadas entre as 3 da tarde do pasado venres e a 12 da noite deste martes, día 7. O maior número de atencións por sinistros rexistráronse o sábado con 22 incidentes.
Os recursos sanitarios mobilizados polo 061 ascenderon a 94. En concreto, as ambulancias medicalizadas acudiron a oito sinistros; as asistenciais realizaron 77 saídas e as convencionais, dous; mentres que os médicos de Atención Primaria prestaron asistencia en sete ocasións.
En 93 casos os feridos foron levados aos centros hospitalarios correspondentes e en seis ocasións a centros de Atención Primaria, mentres que sete persoas recibiron asistencia no lugar do accidente sen necesitar traslado.
A proporción de homes e mulleres atendida foi do 50%, en canto ñás idades dos feridos, un 25% dos asistidos tiña entre os 30 e 39 anos. Por provincias, Pontevedra, con 32, foi a que rexistrou o maior número de accidentes durante os desprazamentos destas datas; seguida de A Coruña, con 31; Ourense, con seis; e Lugo, con tres.
