Co voto en contra do Partido Popular e a abstención do PSdG, o Parlamento de Galicia rexeitou, este martes, a creación dunha comisión de investigación sobre o accidente do tren Alvia que cubría a ruta Madrid – Ferrol o pasado 24 de xullo provocou 79 vítimas mortais e máis dun centenar de feridos, algúns deles aínda hospitalizados.
A proposta de creación desta comisión de investigación foi defendida por Alternativa Galega de Esquerda (AGE) e o BNG, a través dos seus voceiros parlamentarios, Xosé Manuel Beiras e Francisco Jorquera, respectivamente, os cales arremeteron contra os populares por impedir esta investigación.
Ata este martes o PSdeG non quixera revelar publicamente o sentido do seu voto e xustificou a súa abstención apelando ás investigacións abertas e á prudencia. Ao respecto, matizou que «non renuncia a nada», ao tempo que reafirmouse no seu compromiso de que se coñeza todo o acontecido.
Rematado o debate, os socialistas informaron do rexistro de solicitude dunha comisión especial para a análise do accidente ferroviario, así como para a elaboración de propostas para a mellora da seguridade ferroviaria en Galicia. O escrito – que entrou no rexistro do Parlamento preto do mediodía, subliña que esta comisión «sería compatible con outras existentes e encargaríase de analizar as causas do tráxico accidente», facendo un «seguimento» para asegurar, en primeiro termo, unha axeitada atención ás vítimas e aos seus familiares e buscando unha clarificación das causas do accidente».
